“Janubiy” MFY hududida yoritish tizimi holati o‘rganildi

Xalq deputatlari Navoiy shahar Kengashi deputati Poleshuk Natalya Valeryevna hamda Kengash kotibiyati bosh mutaxassisi Muborak Astanovalar tomonidan Navoiy shahridagi “Janubiy” mahalla fuqarolar yig‘ini hududida joylashgan “Janubiy” 11-uy, “Janubiy” 12A hamda “Janubiy” 2 va 7-uylar oralig‘ida yoritish tizimi mavjud emasligi holati o‘rganildi.

O‘rganish jarayonida mazkur hududda tungi yoritish tizimi yo‘qligi sababli fuqarolar, ayniqsa bolalar va keksalar uchun harakatlanishda noqulayliklar yuzaga kelayotgani, shuningdek, jamoat xavfsizligi va yo‘l harakati xavfsizligiga salbiy ta’sir ko‘rsatishi mumkinligi qayd etildi.

Mazkur holat O‘zbekiston Respublikasi Prezidentining 2022-yil 28-yanvardagi PF–60-son Farmoni bilan tasdiqlangan “2022–2026-yillarga mo‘ljallangan Yangi O‘zbekistonning Taraqqiyot strategiyasi” hamda “Obod mahalla” dasturi doirasida aholi punktlarida infratuzilmani rivojlantirish, jamoat xavfsizligini ta’minlash va yashash sharoitlarini yaxshilashga qaratilgan vazifalar ijrosi doirasida o‘rganildi.

O‘rganish yakunlari bo‘yicha mas’ul tashkilotlarga hududda yoritish tizimini o‘rnatish va mavjud infratuzilmani tiklash bo‘yicha zarur chora-tadbirlarni belgilangan tartibda amalga oshirish yuzasidan tavsiyalar berildi.

Mazkur o‘rganish ishlari aholi uchun xavfsiz va qulay yashash muhitini yaratish hamda mahalla infratuzilmasini yanada yaxshilashga xizmat qiladi.