Xalq deputatlari tuman Kengashi kotibiyati bosh mutaxassisi G.Abduvositova tomonidan o‘ziga biriktirilgan To‘rttol mahallasi hududida tuman Kengashi deputati U.Achilov bilan birgalikda aholini qiynab kelayotgan muammolarni o‘rganish, maqsadida o‘rganish ishlari olib borildi. O‘rganish davomida mahallaning Teraksoy ko‘chasidagi elektr ta’minoti bilan bog‘liq muammolar atroflicha ko‘zdan kechirildi. Aniqlanishicha, mazkur ko‘chada o‘rnatilgan elektr uzatish simyog‘ochlari ancha yillar davomida foydalanilgan bo‘lib, hozirgi kunda o‘ta eskirgan holatga kelgan. Shuningdek, elektr simlarining osilib qolgani va ayrim joylarda bir-biriga tegib turishi sababli kuchsiz shamol yoki noqulay ob-havo sharoitida ham elektr energiyasi ta’minotida uzilishlar yuzaga kelayotgani ma’lum bo‘ldi. Mazkur holat aholi uchun qator noqulayliklar tug‘dirib, xonadonlarning uzluksiz elektr energiyasi bilan ta’minlanishiga salbiy ta’sir ko‘rsatmoqda. Fuqarolarning ta’kidlashicha, ushbu muammo yuzasidan
tegishli elektr ta’minoti tashkilotlariga bir necha bor murojaat qilingan bo‘lsa-da, hozirgi kunga qadar amaliy natijaga erishilmagan. O‘rganish jarayonida aholi vakillari bilan suhbat o‘tkazilib, ularning taklif va mulohazalari tinglandi.
Murojaatlarda ko‘tarilgan masalaning dolzarbligi inobatga olinib, elektr tarmoqlarini ta’mirlash, eskirgan simyog‘ochlarni almashtirish hamda elektr uzatish tarmoqlarini me’yoriy holatga keltirish yuzasidan mas’ul tashkilotlarga Xalq deputatlari tuman
Kengashi deputati nomidan deputatlik so‘rovi yuborishga kelishib olindi. Kelgusida ham mahallalarda mavjud muammolarni joyiga chiqqan holda o‘rganish, aholi murojaatlarini tizimli hal etish va ularning hayot sifatini yaxshilashga qaratilgan ishlar izchil davom ettiriladi.