Elektr tarmoqlarini modernizatsiya qilish ishlari deputatlik nazorati doirasida o‘rganildi

📁 Xalq deputatlari Uchtepa tumani Kengashi deputatlarining 24 talik tavsiyalari ijrosi doirasida aholini elektr energiyasi, tabiiy gaz hamda issiq va sovuq suv bilan uzluksiz ta'minlash borasida amalga oshirilayotgan ishlar deputatlik nazorati tartibida o‘rganildi.

🇺🇿 O‘rganish xalq deputatlari Uchtepa tumani Kengashi deputatlari Ulug‘bek Begjanov hamda Ibrohimjon Abdullayev ishtirokida, shuningdek, Xalq deputatlari Uchtepa tumani Kengashi kotibiyati mudiri Anvar Usmanov, bosh mutaxassis Umidbek Abilov hamda "mahalla yettiligi" a'zolari bilan birgalikda olib borildi.

🗂 Deputatlik nazorati davomida O‘zbekiston Respublikasining 2024-yil 7-avgustdagi O‘RQ-939-son "Elektr energetikasi to‘g‘risida"gi Qonuni hamda elektr energetikasi sohasini rivojlantirish bo‘yicha manzilli dasturlar ijrosi doirasida amalga oshirilayotgan ishlar bilan tanishildi.

⚡️ Xususan, 2056-sonli transformator punkti (TP) orqali o‘tuvchi eskirgan elektr tarmoqlari zamonaviy SIP (o‘zini o‘zi ushlab turuvchi izolyatsiyalangan sim) tarmoqlariga almashtirilmoqda. Mazkur loyiha natijasida 50 dan ortiq xonadon sifatli va barqaror elektr ta'minoti bilan qamrab olinadi, elektr tarmoqlaridagi texnik yo‘qotishlar kamayadi hamda elektr ta'minotining ishonchliligi yanada oshiriladi.

⚙️ Ta'kidlanganidek, Toshkent shahrida, jumladan Uchtepa tumanida elektr energetikasi infratuzilmasini modernizatsiya qilish bo‘yicha amalga oshirilayotgan manzilli dasturga Shofayzbog‘, Degrez, Bog‘ichinor, Nishabariq, Bekobod, Istirohat va Ibrat mahallalari kiritilgan. Mazkur dastur doirasida eskirgan transformatorlar, elektr uzatish tarmoqlari va kabellar bosqichma-bosqich yangilanib, aholini barqaror elektr energiyasi bilan ta'minlashga alohida e'tibor qaratilmoqda.

🧠 O‘rganish yakunida amalga oshirilayotgan ishlarning sifati, belgilangan muddatlarda bajarilishi hamda fuqarolar murojaatlarida ko‘tarilgan masalalarni o‘z vaqtida hal etish yuzasidan tegishli tavsiyalar berildi.