Xalq deputatlari mahalliy Kengashlari deputatlari zimmasiga yuklatilgan eng muhim vazifalardan biri – aholi bilan doimiy muloqotni yo‘lga qo‘yish, ularning muammo va ehtiyojlarini chuqur o‘rganish hamda joylarda mavjud masalalarning yechimiga ko‘maklashishdan iborat. Shu ma’noda, saylovchilar bilan o‘tkazilgan uchrashuvlar o‘zaro ishonch va hamkorlikni mustahkamlashga xizmat qilmoqda. 

Uchrashuvlar davomida yurtimizda amalga oshirilayotgan keng qamrovli islohotlar, Qoraqalpog‘iston Respublikasini ijtimoiy-iqtisodiy rivojlantirish, aholi farovonligini oshirish, muhandislik-kommunikatsiya tarmoqlarini modernizatsiya qilish, ijtimoiy himoyani kuchaytirish va yangi ish o‘rinlari yaratishga qaratilgan davlat siyosati yuzasidan atroflicha tushuntirishlar berilmoqda hamda Amudaryo tuman Kengashi sessiyalarida qabul qilinayotgan qarorlarning mazmun-mohiyati ham tushuntirilmoqda. 

Shuningdek, «Mahallani rivojlantirish va jamiyatni yuksaltirish yili» Davlat dasturi doirasida amalga oshirilayotgan ishlar, shu jumladan, mahallalar infratuzilmasini yaxshilash, aholini ijtimoiy qo‘llab-quvvatlash, bandlikni ta’minlash, tadbirkorlikni rivojlantirish, ta’lim va sog‘liqni saqlash tizimini takomillashtirish hamda ekologik barqarorlikni ta’minlashga qaratilgan chora-tadbirlar yuzasidan saylovchilarga batafsil ma’lumotlar yetkazildi. 

Joriy yilning o‘tgan davrida saylovchilardan kelib tushgan 11 ta murojaatning barchasi belgilangan tartibda o‘rganilib, tegishli idora va tashkilotlar bilan hamkorlikda ko‘rib chiqildi va aksariyati ijobiy hal etildi, qolgan masalalar yuzasidan tegishli ishlar davom ettirilmoqda. 

Xususan, «Navoiy» mahallasi ko‘chalarini asfaltlash, tungi yoritish tizimini yaxshilash, piyodalar yo‘laklarini barpo etish kabi obodonlashtirish ishlari amalga oshirildi. Shu bilan birga, ijtimoiy himoyaga muhtoj oilalarga oziq-ovqat mahsulotlari yetkazib berildi, sog‘lig‘ida muammosi bo‘lgan fuqarolar uchun bepul tibbiy ko‘riklar tashkil etildi hamda zarur dori-darmonlar bilan ta’minlandi. Bu kabi amaliy ishlar aholi farovonligini ta’minlash va hayot sifatini yaxshilashga munosib hissa bo‘lib xizmat qildi. 

Shu bilan birga, Xalq deputatlari Amudaryo tuman Kengashi sessiyalari, doimiy komissiyalar va deputatlik guruhi yig‘ilishlarida hududlarni ijtimoiy-iqtisodiy rivojlantirish, aholi manfaatlarini ta’minlash, partiya elektoratining huquq va manfaatlarini himoya qilishga qaratilgan taklif hamda tashabbuslarni ilgari surishga alohida e’tibor qaratilmoqda. Aholi bilan samarali muloqot, murojaatlarni o‘z vaqtida ko‘rib chiqish va joylardagi dolzarb muammolarni hal etishga qaratilgan bunday yondashuv deputatlik faoliyatining muhim mezoni hisoblanadi. Zero, xalq ishonchini oqlash, har bir murojaat ortida turgan inson manfaatini ta’minlash va mahallalar taraqqiyotiga hissa qo‘shish deputat zimmasidagi eng muhim mas’uliyatdir.

Gulshod YUSUPOVA,
1- “Navoiy” saylov okrugidan Xalq deputatlari Amudaryo tuman Kengashi deputati