Xalq deputatlari Parkent tumani Kengashiga 17-“Bo‘rsiliq” saylov okrugidan saylangan deputat Muxitdinov Xusnitdin Muxitdinovich tomonidan deputatlik nazorati doirasida O‘zbekiston Respublikasining 2002-yil 5-apreldagi “Chiqindilar to‘g‘risida”gi 362-II-son Qonuni ijrosi yuzasidan ZERO-WASTE MChJ Parkent tuman filiali faoliyati o‘rganildi.O‘rganishda tuman Kengashi kotibiyati bosh mutaxassisi Mirzayev Dilshod Ruxutdin o‘g‘li ham ishtirok etdi.Jarayon davomida korxona rahbariyati bilan suhbat o‘tkazilib, tuman hududida maishiy chiqindilarni belgilangan reja-grafik asosida o‘z vaqtida olib chiqish, chiqindi konteynerlarining soni va
joylashuvi, sanitariya holati, noqonuniy chiqindi tashlash holatlarining oldini olish hamda aholi ekologik madaniyatini yuksaltirish borasida amalga oshirilayotgan ishlar yuzasidan batafsil ma’lumotlar olindi.Mas’ul xodimlarning ma’lum qilishicha, bugungi kunda filialda qariyb 100 nafar xodim faoliyat yuritmoqda. Korxona tasarrufida 17 ta chiqindi tashuvchi maxsus texnika, 244 ta chiqindi konteyneri hamda 3 ta chiqindi yig‘ish shoxobchasi mavjud.Shuningdek, barcha maxsus transport vositalariga GPS kuzatuv uskunalari o‘rnatilgani, bu esa xizmat ko‘rsatish sifatini oshirish, transport harakatini onlayn nazorat qilish va reja-grafik asosida samarali faoliyat yuritishga xizmat qilayotgani ta’kidlandi.Ma’lum qilinishicha, Parkent tumanidagi 53 ta mahallada qattiq maishiy chiqindilar tasdiqlangan reja-grafik asosida “Signal” usulida olib chiqib ketilmoqda. O‘rganish yakunida deputat tomonidan mutasaddilarga chiqindilarni belgilangan muddatlarda olib chiqishni qat’iy ta’minlash, aholidan kelib tushayotgan murojaatlarni tezkor ko‘rib chiqish, sanitariya holatini yanada yaxshilash hamda xizmatlar sifatini oshirish yuzasidan tegishli tavsiya va takliflar berildi.Mazkur deputatlik nazorati hududlarda sanitariya-epidemiologik osoyishtalikni mustahkamlash, chiqindilarni boshqarish tizimi samaradorligini oshirish hamda “Chiqindilar to‘g‘risida”gi Qonun ijrosini ta’minlashga xizmat qiladi.