Жорий йилнинг 25 март куни Навоий шаҳрида халқ депутатлари вилоят, туман ва шаҳар Кенгашлари учун “Маҳаллий Кенгашларнинг ижтимоий тармоқлардаги фаолиятини самарали ташкил этиш” мавзусида семинар ташкил этилди.

Семинар Демократик жараёнларни таҳлил қилиш маркази Навоий вилояти ҳудудий бўлинмаси ҳамда халқ депутатлари Навоий вилояти Кенгаши котибияти ҳамкорлигида ўтказилди. 

Тадбирнинг асосий мақсади — маҳаллий Кенгашлар фаолиятини ижтимоий тармоқларда тизимли, очиқ ва самарали ёритиш, аҳоли билан онлайн мулоқотни кучайтириш, шунингдек жамоатчилик фикрини шакллантиришда рақамли платформалар имкониятларидан самарали фойдаланиш бўйича амалий тавсиялар ишлаб чиқишдан иборат бўлди.

Семинар давомида марказ томонидан 2026 йил мобайнида маҳаллий Кенгашлар фаолиятини ижтимоий тармоқларда ёритишнинг бугунги ҳолати, мавжуд муаммолар, ахборот тарқатишда кузатилаётган камчиликлар ҳамда уларни бартараф этиш бўйича таҳлилий маълумотлар тақдим этилди. 

Шунингдек, ижтимоий тармоқларда расмийлик ва очиқлик тамойилларига риоя қилиш, фуқаролар мурожаатларига тезкор жавоб қайтариш, танқидий фикрларга тўғри муносабат билдириш масалаларига алоҳида эътибор қаратилди.

Қайд этилганидек, сўнгги йилларда мамлакатимизда давлат ҳокимияти вакиллик органлари фаолияти очиқлигини таъминлаш, жамоатчилик назоратини кучайтириш ва “халқ билан мулоқот” тизимини ривожлантириш устувор вазифалардан бирига айланган. Бу жараёнда ижтимоий тармоқлар муҳим ахборот майдони сифатида алоҳида аҳамият касб этмоқда. 

Семинар иштирокчилари маҳаллий Кенгашлар ва депутатлар фаолиятини ёритишда контент режалаштириш, фото ва видеоматериаллардан фойдаланиш, ахборотни содда ва тушунарли тилда етказиш ҳамда ижтимоий тармоқларда ижобий имижни шакллантириш юзасидан фикр ва таклифларини билдирдилар. 

Тадбирда халқ депутатлари маҳаллий Кенгашлари раислари, котибият мудирлари, фаол депутатлар, доимий комиссиялар аъзолари ҳамда оммавий ахборот воситалари вакиллари иштирок этди.