Xalq deputatlari Paxtakor tuman Kengashi deputati Qurbonboy Nishonov Bog'ishamol mahallasida istiqomat qiluvchi ijtimoiy himoyaga muhtoj oilalar holidan xabar oldi. Ehtiyojmand fuqarolarning turmush sharoiti, ijtimoiy ahvoli hamda mavjud muammolari o‘rganildi.

Deputat, avvalo, kam ta’minlangan, nogironligi bo‘lgan shaxslar yashayotgan hamda boquvchisini yo‘qotgan oilalar xonadonlarida bo‘lib, ularning yashash sharoitlari bilan yaqindan tanishdi. Suhbatlar jarayonida fuqarolar tomonidan bildirilgan murojaatlar, taklif va muammolar tinglandi.

Aniqlanishicha, ayrim oilalarda moddiy yordamga ehtiyoj, ish bilan ta’minlash, tibbiy xizmatlardan foydalanish hamda ijtimoiy nafaqalar bilan bog‘liq masalalar mavjud. Ushbu muammolarni hal etish yuzasidan tegishli tashkilotlar bilan hamkorlikda amaliy choralar ko‘rish bo‘yicha zarur tavsiyalar berildi.