Xalq deputatlari Ishtixon tuman Kengashiga 11-Chayjovul saylov okrugidan saylangan deputat Soliyeva Vasila Ismoilovna Humo mahallasida joylashgan 2-umumiy o‘rta ta’lim maktabida aholi bilan ochiq muloqot tarzida saylovchilar uchrashuvini o‘tkazdi. Mazkur uchrashuvda mas’ul tashkilotlar vakillari, mahalla faollari hamda hudud aholisi faol ishtirok etdi.

Uchrashuvdan ko‘zlangan asosiy maqsad aholi muammolarini o‘rganish, fuqarolarni qiynab kelayotgan masalalar yuzasidan fikr almashish hamda ularni bartaraf etish bo‘yicha amaliy choralar belgilashdan iborat bo‘ldi. Deputat Soliyeva Vasila Ismoilovna o‘z chiqishida hududni ijtimoiy-iqtisodiy rivojlantirish, mahallada infratuzilmani yaxshilash, aholi bandligini ta’minlash hamda yoshlar va xotin-qizlarni qo‘llab-quvvatlash borasida amalga oshirilayotgan ishlar haqida so‘z yuritdi.

Shuningdek, deputat tomonidan saylovoldi dasturida belgilangan vazifalar ijrosi, hududda olib borilayotgan bunyodkorlik ishlari hamda kelgusidagi rejalar haqida ham batafsil ma’lumot berildi. Fuqarolar tomonidan yo‘l, ichimlik suvi, elektr ta’minoti, bandlik masalalari hamda ijtimoiy yordam bilan bog‘liq bir qator murojaatlar bildirildi.

Uchrashuv davomida mas’ul tashkilotlar vakillari ham fuqarolar tomonidan ko‘tarilgan masalalar yuzasidan o‘z fikr-mulohazalarini bildirib, ayrim murojaatlar joyida hal etildi. Qo‘shimcha o‘rganish talab qiladigan masalalar esa tegishli tartibda nazoratga olinib, ularni ijobiy hal etish bo‘yicha zarur choralar ko‘rilishi ta’kidlandi.

Mazkur uchrashuv ochiq va samimiy ruhda o‘tib, fuqarolarning taklif va muammolarini tinglash, ular bilan bevosita muloqot qilish deputatlik faoliyatining muhim yo‘nalishlaridan biri ekani yana bir bor o‘z ifodasini topdi.