Bugungi kunda mahalla ichki yo‘llarini ta'mirlash ayniqsa mahalla ichki yo‘llarini ta’mirlash dolzarb ahamiyat kasb etmoqda. Bu borada joylarda amalga oshirilayotgan ishlarning holatini ko‘zdan kechirish, fuqarolar uchun yaratilayotgan sharoitlarni o‘rganish mas’ullar zimmasidagi muhim vazifalardan biridir.

Shu maqsadda Xalq deputatlari Ishtixon tuman Kengashi deputatlari N.Kiyamov, M.Raximov hamda Ishtixon tumani hokimi o‘rinbosari — tuman Obodonlashtirish boshqarmasi boshlig‘i S.Ochilovlar tomonidan tumanning olis hududlardan biri bo‘lgan Beshbola mahallasi Oqtosh qishlog‘ida ichki yo‘llarni asfaltlash ishlari sifati o‘rganildi.

Mazkur hudud 2025-yil “Tashabbusli budjet” loyihasining 2-mavsumi g‘oliblaridan biri sifatida e’tirof etilgan bo‘lib, loyiha doirasida mahalla ichki yo‘llarini asfaltlash ishlari bajarilmoqda. O‘rganish davomida yotqizilgan asfalt qoplamasining sifati, yo‘l chetlarini mustahkamlash hamda drenaj tizimlarining holatiga alohida e’tibor qaratildi.

Mutasaddilar tomonidan bajarilgan ishlarning belgilangan me’yor va talablarga mosligi joyida ko‘zdan kechirilib, aniqlangan kamchiliklar yuzasidan tegishli tavsiyalar berildi. Shuningdek, mahalla faollari va aholi vakillari bilan muloqot o‘tkazilib, ularning fikr-mulohazalari tinglandi. Fuqarolar tomonidan bildirilgan taklif va e’tirozlar kelgusida amalga oshiriladigan ishlar sifatini yanada oshirishda muhim omil bo‘lishi ta’kidlandi.

Ta’kidlash joizki, hududlarda amalga oshirilayotgan bunyodkorlik va obodonlashtirish ishlari ustidan jamoatchilik nazoratini ta’minlash, ajratilayotgan mablag‘larning maqsadli sarflanishini nazorat qilish hamda bajarilayotgan ishlar sifatini doimiy monitoring qilib borish muhim ahamiyat kasb etadi.