Avval xabar berganimizdek, 2-Nizomiy saylov okrugida deputatlik o‘rni vakant hisoblanadi. Shu munosabat bilan mahallalar faoliyatini o‘rganish va ular bilan ishlash vazifasi N.Kiyamov zimmasiga yuklatilgan.

Xalq deputatlari Ishtixon tuman Kengashi deputatlari N.Kiyamov hamda M.Raximovlar  Jo‘ra Mahmudov mahallasidagi Yangiobod ko‘chasida bo‘lib, aholining qiynab kelayotgan muammolar bilan yaqindan tanishdilar.

O‘rganishlar natijasida ko‘chalar holati jiddiy e’tiborni talab qilishi ma’lum bo‘ldi. Ayniqsa, yomg‘irli kunlarda katta ko‘lmaklar hosil bo‘lib, piyodalar va transport vositalarining harakati uchun noqulayliklar yuzaga kelmoqda. Bu holat nafaqat harakat xavfsizligiga, balki hududdagi aholining harakatlanishiga ham salbiy ta’sir ko‘rsatmoqda.

Deputatlar muammoni joyida o‘rganib, hudud aholisining fikr va takliflarini tingladilar. Yo‘lning qoniqarsiz holati yuzasidan tegishli mas’ul tashkilotlarga deputatlik so‘rovi yuborilishi hamda ta’mirlash ishlarini tezlashtirish choralarini ko‘rish belgilandi.

Shuningdek, deputatlar mahalla aholisi bilan muntazam uchrashuvlar o‘tkazish orqali hududdagi boshqa muammolarni o‘z vaqtida aniqlash va hal etish, fuqarolarning taklif va murojaatlarini inobatga olish muhimligini ta’kidladilar.