Xalq deputatlari Sirdaryo viloyati hamda Guliston shahar Kengashlari deputatlari — N. Qosimova, V. Xasanov, L. Kenjayeva va Q. To‘rayevlar ishtirokida fuqarolar uchrashuvi tashkil etildi. Unda Nurafshon, Yangi hayot, Ahillik mahallalaridan tashrif buyurgan saylovchilar o‘z murojaatlari bilan qatnashdi.

Uchrashuv deputatlik faoliyatining amaliy natijalariga bag‘ishlandi. Xususan, hududlarda aniqlangan tizimli muammolar, ular yuzasidan tashkilot rahbarlari oldiga qo‘yilgan masalalar, ijro intizomi va nazorat ishlari muhokama qilindi. Deputatlar tomonidan ayrim masalalar yuzasidan takroriy so‘rovlar yuborilgani hamda ijrosi sust kechayotgan yo‘nalishlar bo‘yicha qat’iy nazorat o‘rnatilgani ta’kidlandi.

Muloqot davomida aholini qiynayotgan bekatlar, yo‘l infratuzilmasi, mahallada kuzatuv kameralari, kadastr, piyodalar yo‘laklari va chiqidilarni olib ketish masalalari ko‘tarildi. Har bir murojaat bo‘yicha mas’ul tashkilotlar kesimida aniq topshiriqlar belgilandi hamda ijrosi deputatlik nazoratiga olinishi bildirildi.

Shuningdek, kelgusida hududlarda sayyor qabullar sonini oshirish, fuqarolar murojaatlarini joyida o‘rganish va masalalarni sessiya darajasiga olib chiqish mexanizmlarini kuchaytirish bo‘yicha kelishuvga erishildi.

Uchrashuv tanqidiy-tahliliy ruhda o‘tib, aholining ishonchini oqlash va muammolarni tizimli hal etish deputatlik faoliyatining ustuvor vazifasi ekani qayd etildi.