Xalq deputatlari Parkent tuman Kengashiga 13-Istiqbol saylov okrugidan saylangan deputat, doimiy komissiya raisi Mahmudova Baxtinisa Zuxriddinovna o‘zi saylangan hudud — “Istiqbol” MFYda joylashgan 29-sonli
bolalar musiqa va san’at maktabi faoliyati bilan yaqindan tanishdi. Tashrif davomida muassasaning moddiy-texnik bazasi, binoning umumiy holati, to‘garaklar faoliyati hamda aholiga ko‘rsatilayotgan madaniy xizmatlar sifati o‘rganildi. Xususan, maktabda faoliyat yuritayotgan ijodiy to‘garaklar, yoshlar va xotin-qizlar uchun tashkil etilgan madaniy-ma’rifiy tadbirlar samaradorligi yuzasidan mas’ullar bilan suhbat o‘tkazildi. O‘rganishlar jarayonida hozirda muassasada 12 turdagi to‘garak faoliyat yuritayotgani hamda ularda 267 nafar o‘quvchi qatnashayotgani ma’lum bo‘ldi. Shuningdek, binodagi mavjud jihozlar va sahna anjomlari holati ham ko‘zdan kechirildi. Deputat tomonidan muassasa faoliyatini yanada jonlantirish, yoshlarning bo‘sh vaqtini mazmunli tashkil etish hamda milliy qadriyatlarimizni keng targ‘ib etishga qaratilgan ishlarni kuchaytirish zarurligi ta’kidlandi.