19-20- iyun kunlari Qo‘qon shahrida yana bir muhim voqeaga guvoh bo‘ldik. “Farg‘ona yoshlarining parlamentdagi ovozi” nomli respublika yoshlari forumi ochilish marosimi o‘zining yuksak ma’naviy, siyosiy va ijtimoiy ruhi bilan ajralib turdi. Ayniqsa, bu forumning bevosita Xalq demokratik partiyasi tashabbusi bilan tashkil etilgani — partiyamizning yoshlar taqdiriga, ularning siyosiy ongini shakllantirishga bo‘lgan e’tiborining amaliy isbotidir.

Tadbirda ishtirok etgan Qo‘qon shahar hokimi M. Usmonov va Yoshlar parlamenti raisi o‘rinbosari Shohruh O‘ktamovning nutqlari chuqur hayotiy haqiqatlarga tayangan holda, yoshlarning bugungi siyosiy jarayonlardagi faolligi naqadar muhim ekani haqida teran fikrlar bildirdi. Ularning fikricha, yoshlar nafaqat kelajak egalari, balki hozirgi zamon taraqqiyotining bevosita ishtirokchilari, yetakchi kuchi bo‘lib bormoqda.

Biz ushbu forumni o‘zbek yoshlarining siyosiy tafakkurini boyitish, ularga parlament tizimi va davlat boshqaruvi sirlarini anglash imkonini beruvchi muhim maydon deb hisoblashimiz kerak. Bunday ochiq muloqotlar, fikrlar almashinuvi va tashabbus platformalari — yoshlarda mas’uliyat, fuqarolik pozitsiyasi va jamiyat hayotida faol ishtirok etish madaniyatini shakllantiradi.

Xalq demokratik partiyasi uchun yoshlar — bu partiyaning ijtimoiy tayanchi, g‘oyaviy davomchilari, adolatparvar jamiyat bunyodkorlari. Bugungi tadbir esa bu haqiqatning yana bir yorqin tasdig‘i bo‘ldi.
Shunday ezgu tashabbuslarga boy forumlar orqali yoshlarimizning ovozi nafaqat parlamentda, balki butun jamiyatda yangrashi shubhasiz.

Kelajak yoshlar bilan keladi. Ularni tinglaylik, ularga ishonaaylik va birgalikda adolatli jamiyat sari odimlaylik!

Ruziyeva Madina O’z.XDP Mirobod tuman kengashi deputati.