O‘zbekiston Respublikasi Prezidentining 2025-yil 21-apreldagi “Korrupsiyaga qarshi kurashish tizimini yanada takomillashtirish bo‘yicha belgilangan ustuvor vazifalar ijrosini samarali tashkil etishga doir chora-tadbirlar to‘g‘risida”gi PF-71-son Farmoniga asosan Xalq deputatlari Bo‘stonliq tumani Kengashi raisi O.Babayev tuman Elektr tarmoqlari korxonasi xodimlari, korxonaning viloyat boshqarmasi va Korrupsiyaga qarshi kurashish agentligining mas’ullari ishtirokida o‘tkazilgan korrupsiyaga qarshi kurashish va korrupsiyaviy omillarning oldini olishga bag‘ishlangan yig‘ilishda ishtirok etdi.

🔺Korxona faoliyatida ochiqlik va shaffoflikni ta’minlash, xodimlarning xizmat vazifalarini belgilangan talablar asosida bajarishi, manfaatlar to‘qnashuviga yo‘l qo‘ymaslik hamda korrupsiyaviy holatlarga nisbatan murosasiz munosabatni shakllantirish masalalariga alohida e’tibor qaratildi.

🔺Shuningdek, yig‘ilishda Xalq deputatlari Bo‘stonliq tumani Kengashining Korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha doimiy komissiyasi tomonidan korxona faoliyatini o‘rganish jarayonida aniqlangan kamchiliklar muhokama qilindi.

🔺Qayd etilgan kamchiliklarga tanqidiy yondashilib, har bir aniqlangan holat bo‘yicha mas’ullarga tushuntirish va tegishli tavsiyalar berildi. Shuningdek, kamchiliklarni faqat bartaraf etish bilan cheklanib qolmasdan, ularning kelib chiqishiga sabab bo‘lgan omillarni aniqlash va kelgusida takrorlanishining oldini olish zarurligi ko‘rsatib o‘tildi.

🔺Yig‘ilish yakunida korrupsiyaviy xavflarni kamaytirishga qaratilgan profilaktik choralarni kuchaytirish hamda bu boradagi ishlarni tizimli davom ettirish bo‘yicha mas’ullarga tegishli tavsiyalar berildi.