Xalq deputatlari Karmana tumani Kengashi raisi Z. Ostonov hamda tuman prokurori Z. Barnaev ishtirokida 5-Madaniyat saylov okrugi hududidagi “Madaniyat” mahallasida aholi bilan sayyor qabul o‘tkazildi.
Sayyor qabul davomida mahalla aholisi bilan ochiq va bevosita muloqot qilinib, fuqarolarning murojaatlari, takliflari hamda kundalik hayotida duch kelayotgan muammolari tinglandi.
Murojaatlarning asosiy qismi tabiiy gaz ta’minoti, elektr energiyasi, avtomobil yo‘llarining holati hamda ichimlik suvi ta’minoti bilan bog‘liq masalalarga oid bo‘ldi.
Fuqarolar tomonidan ko‘tarilgan har bir masala mas’ullar ishtirokida atroflicha muhokama qilinib, mavjud muammolarni joyida o‘rganish va qonuniy hal etish bo‘yicha tegishli vazifalar belgilandi. Ayrim murojaatlar yuzasidan fuqarolarga amaldagi tartib-taomillar bo‘yicha tushuntirishlar berildi.
Mazkur sayyor qabul O‘zbekiston Respublikasining 2017-yil 11-sentabrdagi O‘RQ-445-sonli “Jismoniy va yuridik shaxslarning murojaatlari to‘g‘risida”gi Qonuni talablari ijrosini ta’minlash, fuqarolarning murojaat qilish huquqini ro‘yobga chiqarish hamda ularning murojaatlarini o‘z vaqtida va qonuniy tartibda ko‘rib chiqishga qaratildi.
Aholining kundalik turmushiga bevosita taalluqli bo‘lgan gaz, elektr energiyasi, yo‘l va ichimlik suvi kabi masalalarning joyida o‘rganilishi mavjud muammolarni aniqlash va ularni mas’ul tashkilotlar bilan hamkorlikda hal etish imkonini beradi.
Xalq bilan ochiq muloqot, aholi murojaatlarini tinglash va ko‘tarilgan masalalarning qonuniy yechimini ta’minlash — Kengash faoliyatining muhim yo‘nalishlaridan biridir.