O‘zbekiston Respublikasi Prezidentining “Faol tadbirkor” ko‘krak nishoni bilan taqdirlash to‘g‘risidagi Farmoyishi qabul qilingani mamlakatimizda tadbirkorlikni qo‘llab-quvvatlash, faol va tashabbuskor ishbilarmonlarni rag‘batlantirish yo‘lidagi muhim qadamdir.

🌏Deputat sifatida ushbu Farmoyishni yurtimizda ishbilarmonlik muhitini yanada yaxshilash, yangi ish o‘rinlari yaratish, innovatsion g‘oyalarni amaliyotga joriy etish va aholi farovonligini oshirishga xizmat qiladigan muhim tashabbus sifatida baholayman. Zero, “Faol tadbirkor” ko‘krak nishoni nafaqat tadbirkorning biznesdagi yutuqlarini, balki uning jamiyat va hudud rivojiga qo‘shayotgan hissini ham e’tirof etishning yorqin ifodasidir.

🌏Ayniqsa, tadbirkorlarning ishlab chiqarish va eksport salohiyatini oshirish, bandlikni ta’minlash, zamonaviy texnologiyalarni joriy etish hamda ijtimoiy hayotda faol ishtirok etishi bugungi kun talablaridan biridir. Bunday fidoyi va tashabbuskor insonlarning davlat tomonidan munosib rag‘batlantirilishi boshqa tadbirkorlar uchun ham yangi g‘oyalar va ezgu tashabbuslarga katta turtki beradi.

🌏Ishonchim komilki, ushbu e’tirof tadbirkorlarni yanada faol bo‘lishga, yangi loyihalarni amalga oshirishga va hududlar iqtisodiy taraqqiyotiga munosib hissa qo‘shishga ruhlantiradi.

🌏Faol, tashabbuskor va mas’uliyatli tadbirkorlar safi kengayishi — mahallalarimizda yangi ish o‘rinlari, oilalarda barqaror daromad va hududlarimizda yanada yuqori farovonlik demakdir.