ДЕПУТАТ ТАШАББУСИ БИЛАН ЯНГИ ҲОЖАТХОНА ҚУРИЛИШИ БОШЛАНДИ
Халқ депутатлари Янгиқўрғон тумани Кенгаши депутати Мирзалиев Хабибулло Авазбекович жорий йилнинг 14 июль куни ўз сайлов округида жойлашган 28-сонли мактабгача таълим ташкилотида ўрганиш ишларини олиб борган эди.
Ўрганиш жараёнида муассаса ҳожатхонасининг чиқинди ўраси тўлиб кетгани, уни ўз вақтида тозалаш ҳамда чиқиндиларни олиб чиқиш ишлари амалга оширилмагани аниқланган. Шунингдек, ҳожатхона биноси ва ундаги айрим жиҳозлар таъмирталаб ҳолатга келгани қайд этилган эди.
Аниқланган муаммоларни бартараф этиш, тарбияланувчилар учун санитария-гигиена талабларига жавоб берадиган муносиб ва хавфсиз шароит яратиш мақсадида депутат Мирзалиев Хабибулло Авазбековичнинг шахсий маблағлари ҳисобидан муассаса ҳудудида янги ҳожатхона қуриш ишлари бошлаб юборилди.
Айни пайтда қурилиш ишлари белгиланган талаблар асосида олиб борилмоқда. Мазкур ташаббус мактабгача таълим ташкилотидаги мавжуд шароитларни яхшилаш ҳамда болалар саломатлигини муҳофаза қилишга хизмат қилади.