Ijtimoiy soha, yoshlar siyosati, madaniyat va sport masalalari bo‘yicha doimiy komissiya a’zolari, Xalq demokratik partiyasi deputatlik guruhi vakillari hamda Kengash Kotibiyati mudiri G‘.Abdullayev bilan hamkorlikda tumanda aholi o‘rtasida sog‘lom turmush tarzini keng targ‘ib etish, jismoniy tarbiya va sportni rivojlantirish borasida amalga oshirilayotgan ishlar holati yuzasidan joylarda o‘rganish ishlari olib borildi. 

O‘rganish jarayonida hududlarda sport infratuzilmasini rivojlantirish, aholining, ayniqsa yoshlarning sportga bo‘lgan qiziqishini oshirish, ularni muntazam jismoniy mashg‘ulotlarga jalb etish borasida amalga oshirilayotgan ishlar tahlil qilindi. Shuningdek, mavjud imkoniyatlardan samarali foydalanish, sport tadbirlarini tizimli tashkil etish va sog‘lom turmush tarzini keng ommalashtirish masalalariga alohida e’tibor qaratildi. 

Xususan, tuman Sport maktabida yaratilgan sharoitlar, sport zallari, inventarlar holati, murabbiylar faoliyati hamda yosh sportchilar uchun yaratilgan imkoniyatlar atroflicha ko‘rib chiqildi. Shu bilan birga, muassasada mavjud muammolar, ularni bartaraf etish bo‘yicha taklif va tavsiyalar ham muhokama qilindi. 

O‘rganishlar yakunida aniqlangan kamchiliklarni bartaraf etish, mavjud imkoniyatlardan yanada samarali foydalanish, sport infratuzilmasini yanada takomillashtirish hamda yoshlar o‘rtasida sog‘lom turmush tarzini keng targ‘ib etish yuzasidan xulosa qilinib, ijtimoiy soha, yoshlar siyosati, madaniyat va sport masalalari bo‘yicha doimiy komissiyasi navbatdagi yig‘ilishida ko‘rib chiqilishi belgilandi.