Mazkur o‘rganishlar doirasida deputat Sh.Madaminova Maorif mahalla fuqarolar yig‘inida faoliyat yuritayotgan bir qator tadbirkorlik subyektlari ish jarayoni bilan yaqindan tanishdi. Jumladan, “SEVENTEEN INVEST” MCHJda charm-poyabzal mahsulotlari ishlab chiqarish yo‘lga qo‘yilgan bo‘lib, korxonada zamonaviy texnologiyalar asosida sifatli mahsulotlar tayyorlanayotgani alohida e’tiborga molik.

Shuningdek, “MUXTASAR MEXRINUR OMAD” MCHJ faoliyati ham o‘rganilib, bu yerda ishlab chiqarish va xizmat ko‘rsatish jarayonlari samarali tashkil etilgani qayd etildi. Korxonalarda yangi ish o‘rinlari yaratish, aholi bandligini ta’minlash borasida izchil ishlar olib borilmoqda.

Eng e’tiborlisi, mahallada xonadonlarda istiqomat qilayotgan ayollarni ish bilan ta’minlash maqsadida kasanachilik yo‘lga qo‘yilgan. Tadbirkorlar tomonidan uy sharoitida ishlash imkoniyati yaratilgani natijasida ko‘plab xotin-qizlar o‘z daromad manbaiga ega bo‘lib, oilaviy farovonlikni oshirishga hissa qo‘shmoqda.

Bu kabi tashabbuslar nafaqat mahalliy iqtisodiyotni rivojlantirish, balki ijtimoiy barqarorlikni mustahkamlashda ham muhim ahamiyat kasb etadi. O‘rganishlar yakunida mavjud imkoniyatlardan yanada samarali foydalanish, tadbirkorlikni qo‘llab-quvvatlash va kasanachilikni kengaytirish bo‘yicha tegishli tavsiyalar berildi.