Fuqarolarning tashabbuslarini qo‘llab-quvvatlash, hududlarni obodonlashtirish va yashil maydonlarni kengaytirishga qaratilgan “Mening bog‘im” loyihalarining o‘z vaqtida va sifatli amalga oshirilishi muhim ahamiyatga ega.

Shu maqsadda Xalq deputatlari Marg‘ilon shahar Kengashi deputati M.Abdurahmanova tomonidan 2026-yilgi “Mening bog‘im” loyihalari doirasida belgilangan ishlarning o‘z vaqtida boshlanmagani yuzasidan deputat so‘rovi yuborilgan edi.

Marg‘ilon shahar hokimligining 2026-yil 27-avgustdagi 8/2053-son javob xatida mazkur masala yuzasidan tegishli ma’lumotlar taqdim etildi.

Javobda O‘zbekiston Respublikasi Vazirlar Mahkamasining 2024-yil 26-martdagi 156-son qarori bilan tasdiqlangan nizomga muvofiq, “Mening bog‘im” loyihalarida g‘olib deb topilgan loyihalar bo‘yicha ko‘chat ekish, hududlarni obodonlashtirish, “yashil bog‘” va “yashil jamoat parklari”ni barpo etish ishlari belgilangan muddatlarda amalga oshirilishi lozimligi qayd etilgan.

Shuningdek, 2026-yilgi “Mening bog‘im” loyihasi doirasida ishlarning o‘z vaqtida boshlanmagani yuzasidan fuqarolardan murojaatlar kelib tushayotgani, loyihaning kechikish sabablari hamda amalga oshirilishi lozim bo‘lgan ishlarning bugungi holati o‘rganilgani ma’lum qilingan.

Eng muhimi, deputat so‘rovida ko‘tarilgan masala yuzasidan tegishli tashkilotga ijro uchun yo‘naltirilgan topshiriqlar deputatlik nazoratiga olingan.

Bu esa fuqarolar tashabbusi asosida shakllantirilgan loyihalarning qog‘ozda qolib ketmasligi, g‘olib loyihalarning amaliy natijaga aylanishi va belgilangan ishlarning o‘z vaqtida bajarilishini ta’minlashda deputatlik nazoratining muhim o‘rin tutayotganini ko‘rsatadi.

Xalq deputatlari Marg‘ilon shahar Kengashi deputatlari tomonidan aholi murojaatlarida ko‘tarilayotgan masalalarni joyida o‘rganish, mutasaddi tashkilotlarga deputatlik so‘rovlari yuborish va ularning ijrosini nazorat qilish ishlari izchil davom ettirilmoqda.