GULISTON MAHALLASIDA YO‘L QURILISH ISHLARI O‘RGANILDI

Хalq deputatlari Navoiy viloyati Kengashi kotibiyati mudiri J. Hamroyev hamda xalq deputatlari Navoiy shahar Kengashi deputatlari J. Hafizov va B. Umarov Navoiy shahridagi Guliston mahallasida amalga oshirilayotgan yo‘l qurilishi ishlari bilan tanishdilar.

Tashrif davomida mahallada olib borilayotgan yo‘l qurilishi va ta’mirlash ishlari, ularning sifati, belgilangan loyiha hamda tasdiqlangan jadval asosida bajarilishi o‘rganildi. Shuningdek, yo‘l qurilishida foydalanilayotgan qurilish materiallari sifati, texnika va mexanizmlarning jalb etilishi hamda ishlarning borishi yuzasidan mutasaddilarning axboroti tinglandi.

Deputatlar qurilish ishlari olib borilayotgan hududni ko‘zdan kechirib, yo‘llarning aholiga qulay va xavfsiz bo‘lishi, piyodalar harakati uchun zarur sharoitlar yaratilishi hamda qurilish jarayonida belgilangan me’yor va talablarga qat’iy rioya etilishi yuzasidan o‘z tavsiyalarini bildirdilar.

Shuningdek, mahalla faollari va fuqarolar bilan muloqot o‘tkazilib, yo‘l infratuzilmasini yaxshilash bo‘yicha ularning fikr va takliflari tinglandi. Aholi tomonidan ko‘tarilgan masalalar yuzasidan mutasaddi tashkilotlarga tegishli tavsiyalar berildi hamda ularning ijrosini ta’minlash yuzasidan zarur choralar ko‘rish lozimligi ta’kidlandi.

O‘rganish yakunida yo‘l qurilishi ishlarini sifatli va belgilangan muddatlarda yakunlash, qurilish jarayonida texnik va ekologik talablarga rioya etish, shuningdek, amalga oshirilayotgan ishlar ustidan doimiy nazoratni kuchaytirish bo‘yicha mas’ullarga tegishli tavsiyalar berildi.