O‘zbekiston Adolat SDP Ellikqal’a tuman Kengashi tashabbusi bilan 2-son Respublika ruhiy va
asab kasalliklari dispanserida “Ogoh bo‘ling, firibgar!” mavzusida targ‘ibot tadbiri tashkil etildi. 

 Tadbirda “Adolat” SDP Ellikqal’a tuman Kengashi raisi, Xalq deputatlari Ellikqal’a tuman Kengashi deputati U. Karimov hamda Ellikqal’a tuman Adliya bo‘limi bosh maslahatchisi O. Reyimboev ishtirok etdilar. Shuningdek, dispanser shifokorlari va ishchi-xodimlari ham faol qatnashdilar. 

 Tadbir davomida U. Karimov firibgarlik tushunchasi, uning jamiyat uchun ijtimoiy xavfliligi, fuqarolarga yetkazayotgan moddiy va ma’naviy zarari haqida batafsil
tushuntirish berdi.   

Ayniqsa, bugungi kunda kiber makonda sodir etilayotgan huquqbuzarliklar, internet va ijtimoiy tarmoqlarda uchrayotgan turli aldov usullari haqida atroflicha ma’lumot
berildi.   

Shuningdek, tadbirda dispanser bosh shifokori Z.Iglikova so‘zga chiqib, bunday ma’rifiy uchrashuvlar jamoa uchun nihoyatda muhim ekanini ta’kidladi. U o‘z nutqida fuqarolarning, ayniqsa, tibbiyot xodimlarining huquqiy savodxonligini oshirish, turli firibgarlik holatlariga befarq bo‘lmaslik hamda hushyorlikni kuchaytirish
zarurligini qayd etdi. 

 Ta’kidlanganidek, tadbirdan ko‘zlangan asosiy maqsad — aholining huquqiy ongi va madaniyatini yuksaltirish, firibgarlik bilan bog‘liq jinoyatlarning oldini olish,
fuqarolarni turli aldov va qonunbuzarlik holatlaridan ogoh etish hamda ularning qonuniy huquq va manfaatlarini himoya qilishdan iborat. 

 Yakunda dunyoda yuz berayotgan ijtimoiy-siyosiy jarayonlar yuzasidan ham fikr almashildi. Ishtirokchilar o‘zlarini qiziqtirgan savollarga javob olib, zarur huquqiy
bilimlarga ega bo‘ldilar.   

Bunday targ‘ibot tadbirlari jamiyatda hushyorlikni oshirish va huquqbuzarliklarning oldini olishda muhim ahamiyat kasb etadi.