Shu munosabat bilan Xalq deputatlari Termiz shahar Kengashi raisi, deputat D.Normuradova, «Nuroniy» jamg‘armasi Termiz shahar bo‘limi raisi, 23-“Pattakesar” saylov okrugi deputati T. Berdiyev hamda jamoatchilik faollari "Ma’rifat" mahallasida istiqomat qiluvchi 88 yoshli onaxon — Roziyeva Xaitgul Xamrayevna xonadoniga tashrif buyurishdi.

Tashrif davomida faxriyning holidan xabar olinib, ko‘p yillik samarali mehnati, jamiyat taraqqiyotiga qo‘shgan munosib hissasi e’tirof etildi. Marosimda unga 1 darajali "Mehnat faxriysi" ko‘krak nishoni tantanali ravishda topshirildi. Shuningdek, Surxondaryo viloyati hokimining esdalik sovg‘asi ham o‘z egasiga topshirildi.

Bunday e’tibor va ehtirom yurtimizda yoshi ulug‘ insonlarni qadrlash, ularning boy hayotiy tajribasi va mehnatini munosib e’tirof etishga qaratilgan ezgu an’analarning amaliy ifodasidir.