Dehqon bozorlarida narx-navо va aholiga yaratilgan shart-sharoitlar o‘rganildi

✔️ “O‘zbekiston – 2030” strategiyasida belgilangan maqsad va vazifalar ijrosini ta’minlash maqsadida Xalq deputatlari Samarqand shahar Kengashi deputatlari tomonidan tegishli mas’ul tashkilotlar xodimlari bilan hamkorlikda tuzilgan ishchi guruh shahardagi dehqon bozorlarida o‘rganish ishlarini olib bordi.

✔️ Jumladan, Samarqand shahrida joylashgan “Siyob” va “Temiryo‘l” dehqon bozorlarida aholini oziq-ovqat mahsulotlari bilan uzluksiz ta’minlash, “Yangi yil” bayrami arafasida narx-navoning barqarorligini saqlash, ichki bozorlarda mahsulotlar narxining asossiz oshishining oldini olish, shuningdek, kuz-qish mavsumi uchun oziq-ovqat mahsulotlari zaxiralarini yaratish borasida amalga oshirilayotgan ishlar o‘rganildi.

✔️ O‘rganishlar davomida qish va bahor mavsumi uchun oziq-ovqat zaxiralarini sifatli saqlash, tadbirkorlar bilan hamkorlikni yanada mustahkamlash, ularga qulay shart-sharoitlar yaratib berish, mahsulotlarning sovuq ta’sirida muzlab qolishining oldini olish masalalariga alohida e’tibor qaratildi. Shuningdek, sotuvchi va xaridorlar uchun qulaylik yaratish maqsadida savdo pavilyonlari atrofini himoyalovchi materiallar bilan o‘rash, mavjud muammo va kamchiliklarni bartaraf etish yuzasidan bozor ma’muriyatlariga tegishli taklif va tavsiyalar berildi.

✔️ Ishchi guruh tomonidan qish mavsumini betalofat o‘tkazish, aholi uchun sifatli va arzon oziq-ovqat mahsulotlari mavjudligini ta’minlash bo‘yicha amaliy chora-tadbirlarni kuchaytirish zarurligi ta’kidlandi.

✔️ Ma’lumot o‘rnida aytish joizki, “Siyob” dehqon bozorining umumiy yer maydoni 3,4 gektarni tashkil etib, unda 59 nafar ishchi faoliyat yuritmoqda. “Temiryo‘l” dehqon bozorining umumiy yer maydoni esa 1,3 gektar bo‘lib, mazkur bozorda 17 nafar ishchi mehnat qilmoqda.

Fazliddin G‘aybullayev,

xalq deputatlari shahar Kengashi deputati