Xalıq deputatları Bozataw rayonlıq Keńesi 3-sanlı "Mádeniyat" saylaw okruginen (ÓzXDP) saylanǵan deputat G.Yusupova hám "Mádeniyat" máhálle biyi A.Abdireymov penen birgelikte saylaw okrugi aymaǵında jaylasqan A.Temur kóshesindegi puqaralar menen úyme-úy júrip, olardıń jasaw sharayatların úyreniw, múrájatların tıńlaw hám bar máselelerdi ornında anıqlaw maqsetinde ashıq sáwbetler ótkerdi.

Úyme-úy júriw dawamında deputat hár bir shańaraqqa kirip, puqaralardıń sociallıq jaǵdayı, turmıs sharayatları, kúndelikli ushırasıp atırǵan qıyınshılıqlar hám olardı qızıqtırǵan máseleler menen jaqınnan tanıstı. Sonıń menen birge, puqaralar menen erkin pikir alısılıp, olardıń usınıs-pikirleri hám múrájatları tıńlandı.

Sóylesiwler dawamında máhálle infrastrukturasın jaqsılaw, atap aytqanda ishki kóshelerdiń jaǵdayın jaqsılaw, jollardı ońlaw, kóshelerdi jaqtılandırıw, abadanlastırıw jumısların kúsheytiw, xalıqtı bántlik penen támiyinlew, sonday-aq, sociallıq járdemge mútáj shańaraqlardı qollap-quwatlaw boyınsha bir qatar múrájatlar bildirildi.

Deputat tárepinen puqaralar kótergen hár bir másele úyme-úy júriw dápterine kirgizilip, olardıń orınlanıwın támiyinlew maqsetinde tiyisli mákemeler hám shólkemlerge deputatlıq sorawlar tayarlaw hám jiberiw belgilep alındı. Sonday-aq, kóterilgen máselelerdiń sheshimin deputatlıq qadaǵalawǵa alıp, olardıń orınlanıwın úzliksiz qadaǵalap barıw rejelestirildi.

Bunday úyme-úy júriwler puqaralar menen tikkeley sóylesiw ornatıwǵa, olardıń múrájatların óz waqtında úyreniwge hám aymaqtaǵı áhmietli máselelerdi tez arada sheshiwge qaratılǵan áhmietli ámeliy ilaj bolıp esaplanadı.