O‘zining tarixiy ildizlariga ega bo‘lgan o‘qituvchilik kasbi hozirgi davrda yana bir bor yuksak e’tirofga sazovor bo‘lmoqda. Prezidentimiz o‘qituvchilar va murabbiylar bilan o‘tkazgan muloqotida pedagoglarni xalqning eng aziz vakillari, kelajak bunyodkorlari sifatida e’tirof etgani - har birimizga katta g‘urur va mas’uliyat yuklaydi. Bugungi jamiyatda ustozning nufuzi qayta tiklanmoqda, moddiy va ma’naviy qo‘llab-quvvatlashlar kengaymoqda. Ammo eng muhimi - bu so‘zdagi emas, amaldagi qadrdir. Muloqotdan shuni his qildikki, ustozlarning fikri endi yuqoriga yetib borayapti, u tinglanayapti, hurmat qilinayapti. Har bir sharoit, har bir imkoniyat ustozning bemalol ishlashi, o‘z ustida izlanishi, zamonaviy bilimlarga ega bo‘lishi uchun yaratilyapti. Bizdan, xususan, pedagoglardan talab qilinadigan yagona narsa - imkoniyatdan to‘g‘ri foydalanish va o‘z ustimizda tinimsiz ishlash. Zero, ustoz qadr topayotgan yurtda - jamiyat ham, yoshlar ham, kelajak ham qadr topadi. Nursulton Xosilmurodov, Xalq deputatlari Jizzax shahar Kengashi deputati