Ózbekstan Respublikası Prezidenti Shavkat Mirziyoevtiń Koreya Respublikasına mámleketlik saparı, meniń pikirimshe, eki mámleket arasındaǵı strategiyalıq sheriklikti jáne de bekkemlewge xızmet etetuǵın áhmiyetli saparlardan biri boldı.

Ásirese, sapar dawamında sawda-ekonomikalıq baylanıslardı keńeytiw, investiciyalardı tartıw, zamanagóy texnologiyalar hám innovaciyalardı rawajlandırıwǵa úlken itibar qaratılǵanı dıqqatqa ılayıq. Sanlı ekonomika, transport-logistika, kiberqawipsizlik hám basqa da keleshegi bar baǵdarlarda sheriklikti rawajlandırıw boyınsha kelisimler mámleketimiz ushın jańa imkaniyatlar jaratadı.

Koreyanıń aldınǵı qatarlı texnologiyaları hám bay tájiriybesinen nátiyjeli paydalanıw Ózbekstannıń ekonomikalıq hám texnologiyalıq qábiletin jáne de asırıwǵa járdem beredi. Ásirese, jaslar ushın zamanagóy bilim alıw, jańa kásiplerdi iyelew hám xalıqaralıq tájiriybege iye bolıw imkaniyatlarınıń keńeyiwi ayrıqsha áhmiyetke iye.

Sapar sheńberinde «Oraylıq Aziya – Koreya Respublikası» sammitiniń ótkerilgeni de áhmiyetli waqıya boldı. Bul Oraylıq Aziya mámleketleri menen Koreya Respublikası arasındaǵı sheriklikti jańa baǵdarlarda rawajlandırıw ushın bekkem tiykar jaratadı.

Sonday-aq, Koreyada bilim alıp atırǵan hám miynet etip atırǵan jerleslerimiz benen ushırasıw ótkerilgeni júdá jaqsı tásir qaldırdı. Bul shet ellerde jasawshı jerleslerimiz benen baylanıslardı bekkemlewge hám olardıń máplerin qollap-quwatlawǵa úlken itibar beriletuǵının kórsetedi.

Ulıwma alǵanda, bul sapardı Ózbekstan ushın jańa investiciyalardı, aldınǵı qatarlı texnologiyalar hám tájiriybelerdi engiziw, xalıqaralıq sheriklikti keńeytiw hám mámleketimizdiń rawajlanıwı ushın qosımsha imkaniyatlar jaratıw jolındaǵı áhmiyetli qádem dep esaplayman. Eń áhmiyetlisi, erisilgen kelisimlerdiń ámeliy nátiyjelerge aylanıp, xalqımızdıń turmıs dárejesin jaqsılawǵa xızmet etiwi kerek.