Zamanagóy bilimlendiriw — Qaraqalpaqstan keleshegi ushın bekkem tiykar

Xalıq deputatları Bozataw rayonlıq Keńesine ÓzLiDeP deputat G.Jumanazarova Prezident Shavkat Mirziyoyevtiń Qaraqalpaqstanǵa saparı dawamında bilimlendiriw hám jaslarǵa tiyisli belgilengen wazıypalar haqqında óz pikirlerin bildirdi.

«Bilimlendiriw tarawı — jámiyet rawajlanıwınıń eń áhmiyetli baǵdarlarınıń biri.
Sebebi hár bir balanıń keleshegi, onıń bilim alıwı hám kásip iyelew jolı mektepten baslanadı.
Sonlıqtan oqıwshılarǵa tek teoriyalıq bilim beriw menen sheklenbesten, olardıń qızıǵıwshılıǵı, jeke uqıplılıǵı hám keleshektegi kásiplik maqsetlerine de itibar qaratıwımız kerek.

Prezidenttiń Qaraqalpaqstanǵa saparı dawamında jaslardı zamanagóy kásiplerge baǵdarlaw, bilim sapasın jaqsılaw hám miynet bazarına zárúr bolǵan mamanlardı tayarlaw boyınsha birqatar áhmiyetli wazıypalar belgilendi. Nókis qalasındaǵı 1-sanlı texnikumda xalıqaralıq bilimlendiriw baǵdarlaması tiykarında kásiplik mamanlardı tayarlaw isleriniń jolǵa qoyılıwı da usı baǵıttaǵı ámeliy jumıslardıń biri.

Deputat hám mektep basshısı retinde menińshe, eń áhmiyetli máselelerden biri — oqıwshılardı mektep dáwirinen baslap keleshektegi kásibine tayarlaw. Bul baǵıtta mektep, ata-ana, ustazlar hám máhálle menen birgeliktegi jumıslardı jáne de kúsheytiw zárúr.

Búgingi oqıwshıǵa sapalı bilim beriw, onıń zamanagóy kásiplerge bolǵan qızıǵıwshılıǵın arttırıw hám óz qábiletin ashıwına járdemlesiw — keleshektegi jetik mamanlardı tayarlawdıń áhmiyetli shárti.

Jaslarǵa jaratılǵan bilim alıw múmkinshilikleri hám bilimlendiriwge berilgen itibar — Qaraqalpaqstannıń turaqlı rawajlanıwı hám keleshegine salınǵan úlken úles!»

G.Jumanazarova
Xalıq deputatları Bozataw rayonlıq Keńesi
12-sanlı «Aspantay» saylaw okruginen deputat