Депутат назорати: Заркент ва “Маданият” маҳаллаларида амалий ишлар бошланди
Ўзбекистон Республикаси Президентининг 2026 йил 5 февралдаги ПҚ–49-сонли қарори ижроси доирасида Янгиқўрғон туманида аҳоли учун қулай инфратузилма яратиш ишлари давом этмоқда.
Қарорга асосан, Заркент ҳамда “Маданият” маҳаллалари ҳудудида пиёдалар йўлаги қуриш ва лоток ётқизиш белгиланган бўлиб, ушбу ишлар учун 1 млрд 20 млн сўм маблағ йўналтирилиши режалаштирилган.
Бугунги кунда мазкур объектда “BARAKOT-HIMMAT FAYZ” ХК томонидан қурилиш ишлари бошлаб юборилди.
Халқ депутатлари Янгиқўрғон туман Кенгаши депутати Бўтаев Комилжон Охунович объектда бўлиб, олиб борилаётган ишлар ҳолати билан танишди. Ўрганиш давомида дастур доирасидаги ишларни белгиланган муддатларда, сифатли ва талаб даражасида якунига етказиш муҳимлиги таъкидланди.
Шунингдек, тадбиркорлар ва маҳалла аҳолисига ҳудуд ободлигига ҳисса қўшиш, қурилиш ишларига кўмаклашиш ҳамда яратилган шароитлардан оқилона фойдаланиш зарурлиги тушунтирилди.
✅ Депутатлик назорати асосида мазкур ишларнинг сифатли бажарилиши доимий кузатиб борилади.