Jalaquduq tumanini ijtimoiy-iqtisodiy rivojlantirishga qaratilgan davlat dasturlari, shuningdek, amalga oshirilayotgan investitsiya va drayver loyihalar ijrosi yuzasidan manzilli o‘rganish ishlari olib borildi. Mazkur o‘rganishlarda Xalq deputatlari tuman Kengashi raisi Sh. Xayitoxunov, viloyat Kengashi deputati O.Nosirov, kotibiyat mudiri I.Jo‘rayev hamda doimiy komissiya raisi E.Qurbonovlar ishtirok
etdilar.Jumladan, Jalaquduq tumani Do‘ngqishloq mahallasi hududidan oqib o‘tuvchi Shahrixonsoy bo‘yida tadbirkorlik subyektlari tomonidan baliqchilikni rivojlantirish, zamonaviy dam olish maskanlari, savdo va xizmat ko‘rsatish infratuzilmasini tashkil etish bo‘yicha amalga oshirilayotgan loyihalar holati o‘rganildi. Shuningdek, Qilichmozor mahallasi hududida 8,7 gektar yer maydonida barpo etilayotgan
zamonaviy “Eko bozor” qurilishi hamda “Andijon–Xonobod” avtomobil yo‘li yoqasida 500 metr uzunlikdagi zovurni yopiq drenaj tizimi asosida rekonstruksiya qilish va uning atrofida 20 ta savdo hamda xizmat ko‘rsatish shoxobchalarini barpo etish ishlari ko‘zdan kechirildi. O‘rganishlar davomida tadbirkorlar va mahalliy aholi vakillari bilan ochiq muloqotlar o‘tkazilib, ularning fikr va takliflari tinglandi. Suhbat jarayonida tadbirkorlar hamda fuqarolar tomonidan yaratilayotgan qulay shart-sharoitlar va keng imkoniyatlar yuqori baholanib, olib borilayotgan islohotlardan mamnunlik bildirildi.