Xalq deputatlari Surxondaryo viloyati Kengashi kotibiyati mudiri tomonidan Termiz tuman kengashi deputatlari bilan uchrashuv o‘tkazildi.

Uchrashuv davomida O‘zbekiston Respublikasi Prezidentining 2025-yil 23-iyundagi “O‘zbekiston Respublikasida mahalliy davlat hokimiyati vakillik organlari faoliyatini 2030 yilgacha rivojlantirish konsepsiyasini tasdiqlash to‘g‘risida”gi PF–98-son Farmoni ijrosi yuzasidan batafsil ma’lumot berildi. Farmonda belgilangan ustuvor vazifalarni mahalliy kengash deputatlari faoliyatiga to‘liq tatbiq etish, aholiga xizmat ko‘rsatishda yangicha yondashuv va ochiqlikni kuchaytirish masalalari muhokama qilindi.

Shuningdek, yig‘ilishda “Deputatning odob-axloq qoidalari” bo‘yicha tushuntirishlar berilib, deputatlar o‘z vakolatlarini bajarishda halollik, mas’uliyat, xolislik, saylovchi manfaatiga sodiqlik hamda odob-axloq standartlariga rioya etish zarurligi alohida ta’kidlandi.

Uchrashuv davomida deputatlarning amaldagi faoliyatida erishilgan yutuqlar va aniqlangan kamchiliklar yuzasidan ochiq muloqot shaklida davra suhbati tashkil etildi. Saylovchilar bilan uchrashuvlar samaradorligi, murojaatlar ijrosi, tashabbuskorlik darajasi, hududlardagi ijtimoiy muammolarga munosabat kabi jihadlarda amalga oshirilgan ijobiy ishlar qayd etildi.

Shu bilan birga, ayrim deputatlar faoliyatida uchrayotgan kechikishlar, murojaatlar ijrosini to‘liq ta’minlamaslik, axborot berishdagi sustkashlik kabi kamchiliklar ham ochiq muhokama qilinib, ularni bartaraf etish bo‘yicha aniq topshiriqlar belgilandi.