Oliy Majlis deputati Termiz tumanida aholi bilan muloqot qildi

Oliy Majlis Qonunchilik palatasi deputati Ra’no Astanaqulova hamda tuman Kengashi kotibiyati mudiri A. Avliyakulov tumanning olis va chegara hududlaridan biri — “Gulbahor” mahallasida bo‘lib, hududning ijtimoiy-iqtisodiy holati, aholini qiynayotgan muammolar hamda amalga oshirilayotgan ishlarni o‘rgandi.

Tashrif davomida Termiz tumani “Suvoqova” MChJ rahbari M. Odinayev tomonidan hudud aholisini ichimlik suvi bilan ta’minlashni yaxshilash, suv ta’minotining barqarorligini ta’minlash borasida amalga oshirilayotgan ishlar yuzasidan ma’lumotlar olindi.

Shuningdek, deputatlar tomonidan mahalladagi mavjud muammolar, xususan, aholining ichimlik suvi ta’minoti bilan bog‘liq murojaatlari tinglanib, ularni hal etish bo‘yicha mas’ullarga tegishli tavsiyalar berildi.

Tashrif doirasida Navro‘z qishlog‘idagi 27-sonli umumta’lim maktabida ham bo‘lib, yangi o‘quv yili hamda Vatanimiz mustaqilligining 35 yilligi munosabati bilan pedagoglar va o‘quvchilar bilan uchrashuv o‘tkazildi.

Birinchi sinf o‘quvchilariga Bilimlar kuni munosabati bilan ezgu tilaklar bildirilib, ularga yangi o‘quv yilida muvaffaqiyatlar tilandi. Uchrashuv davomida pedagoglar tomonidan bildirilgan muammo va takliflar tinglanib, ularni hal etish yuzasidan tegishli choralar belgilandi.

Tashrif davomida, shuningdek, “Gulbahor” mahallasida Xitoy kompaniyasi tomonidan zamonaviy texnologiyalar asosida paxta yetishtirish jarayonlari ko‘zdan kechirildi. Jarayonda ilg‘or agrotexnologiyalardan foydalanish, hosildorlikni oshirish hamda zamonaviy usullarni amaliyotga joriy etish holati bilan tanishildi.

Bunday amaliy uchrashuv va o‘rganishlar hududdagi mavjud muammolarni aniqlash, aholining murojaatlarini joyida tinglash hamda ularning yechimini ta’minlashga xizmat qilmoqda.