Jamoat xavfsizligini taʼminlash, mahallalarda jinoyatchilik va huquqbuzarliklarning oldini olish har bir hudud rivojining asosiy poydevoridir. Bu borada davlatimiz rahbari tomonidan ilgari surilgan "Mahallabay" tizimi asosida amaliy ishlar izchil davom ettirilmoqda.
Xalq deputatlari Olmaliq shahar Kengashi deputati Faxriddin Matasimov tomonidan hududlarda huquq-tartibotni mustahkamlash hamda jinoyatchilikka qarshi kurashish holati boʻyicha oʻrganishlar oʻtkazildi.

Oʻrganish doirasida amalga oshirilgan asosiy tadbirlar:
🔸Oʻzbekiston Respublikasi Prezidentining PQ-5041 va PQ-104-son qarorlari talablaridan kelib chiqqan holda, ichki ishlar organlari xodimlari bilan hamkorlikda shahardagi mahallalar “qizil”, “sariq” va “yashil” hududlar kesimida atroflicha tahlil qilindi.
🔸Tahlillar natijasiga tayangan holda, asosiy kuch va eʼtiborni hamda profilaktik nazorat tadbirlarini aynan jinoyatchilik koʻrsatkichi yuqori boʻlgan “qizil” hamda xavf guruhi mavjud boʻlgan “sariq” hududlarda jadal olib borishga kelishib olindi.
🔸Huquq-tartibot posbonlari bilan birgalikda jinoyatlarning kelib chiqishiga sabab boʻlayotgan omillar va ijtimoiy-maishiy muammolar aniqlanmoqda.

Aholini qiynayotgan va kriminogen vaziyatga salbiy taʼsir koʻrsatayotgan barcha mavjud muammolar deputatning “Koʻchama-koʻcha aylanish jurnali”ga batafsil qayd etildi.
“Bizning birinchi galdagi vazifamiz — jinoyat sodir etilganidan keyin uni muhokama qilish emas, balki uning barvaqt oldini olish, mahallalarda osoyishtalikni taʼminlashdir. Bu jarayonda deputatlik nazorati va ichki ishlar organlarining hamkorligi yuqori samaradorlik beradi,” — deb taʼkidladi deputat Faxriddin Matasimov.

Aniqlangan muammolarni bosqichma-bosqich hal etish, “qizil” toifadagi mahallalarni “yashil” hududlarga oʻtkazish boʻyicha deputatlik soʻrovlari yuborilishi hamda shahar Kengashining tegishli doimiy komissiyasi muhokamasiga kiritilishi belgilandi.