Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston Xalq demokratik partiyasidan saylangan deputat J.Sadirov, O‘zbekiston “Milliy tiklanish” demokratik partiyasidan saylangan deputat F.Axmedov tomonlaridan tumanning “Sijjak” mahallasida joylashgan 28-sonli maktabgacha ta’lim tashkiloti holati o‘rganildi.

O‘rganish davomida muassasaning binolari, guruh xonalari, oshxonasi, o‘yin maydonchasi, sanitariya holati hamda tarbiyalanuvchilarga yaratilgan imkoniyatlar ko‘zdan kechirildi. Shuningdek, muassasa rahbariyati va mas’ul xodimlar bilan suhbat o‘tkazilib, ta’lim muassasasining bugungi kundagi ehtiyojlari va mavjud muammolari muhokama qilindi.

Ma’lum bo‘lishicha, maktabgacha ta’lim tashkiloti loyiha quvvati 150 o‘ringa mo‘ljallangan bo‘lib, hududda maktabgacha ta’lim yoshidagi bolalar sonining ortib borayotgani sababli mavjud quvvat talabni to‘liq qondirmayapti. Natijada ayrim bolalarni davlat maktabgacha ta’lim tashkilotiga qamrab olish imkoniyati cheklanmoqda.

O‘rganish jarayonida ta’lim muassasasiga tutash umumta’lim maktabining hozirda foydalanilmayotgan qismi hisobidan maktabgacha ta’lim tashkilotini kengaytirish imkoniyati ko‘rib chiqildi. Deputatlar mazkur imkoniyatdan samarali foydalanish maqsadida tegishli loyiha-smeta hujjatlarini ishlab chiqish, foydalanilmayotgan binolarni rekonstruksiya qilish orqali qo‘shimcha guruh xonalarini tashkil etish va muassasa sig‘imini 300 o‘ringa yetkazish bo‘yicha mas’ul tashkilotlar bilan muzokara olib borishlarini bildirdilar.