G‘alaba Shoh ko‘chasida obodonlashtirish ishlari yakuniy bosqichda

Navoiy shahrida aholi uchun yanada qulay va zamonaviy infratuzilmani shakllantirish, mahallalar hamda ko‘chalarning obod qiyofasini ta’minlash borasidagi keng ko‘lamli ishlar izchil davom etmoqda. Shaharning asosiy ko‘chalaridan biri hisoblangan G‘alaba Shoh ko‘chasida olib borilayotgan obodonlashtirish, ta’mirlash va ko‘kalamzorlashtirish ishlari bugungi kunda yakuniy bosqichga yetdi.

Bugun Xalq deputatlari Navoiy shahar Kengashi 1-«Hayot» saylov okrugi deputati Dilmurod Ergashev mazkur hududda bo‘lib, amalga oshirilayotgan ishlarning borishi, ularning sifati hamda mas’ullar zimmasiga yuklatilgan vazifalar ijrosi bilan yaqindan tanishdi.

Shuningdek, ko‘cha va yo‘l yoqalari tartibga keltirildi, yashil hududlar obodonlashtirildi, bino va inshootlarning tashqi qiyofasini yaxshilash bo‘yicha keng qamrovli ishlar amalga oshirildi. Bu o‘zgarishlar nafaqat shaharning ko‘rkiga ko‘rk qo‘shmoqda, balki aholi uchun yanada qulay va shinam muhit yaratishga ham xizmat qilmoqda.
Hududni ko‘zdan kechirish jarayonida barcha ishlarni belgilangan muddatlarda, eng avvalo, sifat va mas’uliyat bilan yakunlash yuzasidan tegishli tavsiyalar berildi.

Obod mahalla va ko‘rkam ko‘chalar — aholining kayfiyati, farovon turmushi hamda shahrimiz taraqqiyotining muhim ko‘rsatkichidir. Shu bois Navoiy shahrini yanada obod, zamonaviy va yashash uchun qulay maskanga aylantirish yo‘lidagi bunyodkorlik ishlari izchil davom ettiriladi.

Yurtimiz ravnaqi, shahrimiz obodligi va xalqimiz farovonligi yo‘lida amalga oshirilayotgan ezgu ishlarda barchamizning hamjihatligimiz va faol ishtirokimiz muhim ahamiyat kasb etadi.