#29_sessiya

Xalq deputatlari Kogon shahar Kengashining 29-sessiyasi bo‘lib o‘tdi

Xalq deputatlari Kogon shahar Kengashining yigirma to‘qqizinchi sessiyasida shaharni ijtimoiy-iqtisodiy rivojlantirish, yoshlar siyosatini samarali amalga oshirish, investitsiya loyihalarini jadallashtirish, mahalliy budjet mablag‘laridan oqilona foydalanish hamda doimiy komissiyalar faoliyatiga oid muhim masalalar ko‘rib chiqildi.

Sessiya davomida Kogon shahrida yoshlarning yozgi ta’til davrini mazmunli, samarali va xavfsiz tashkil etishga qaratilgan “Dolzarb 90 kun” chora-tadbirlar dasturi, investitsiya loyihalarining amalga oshirilish holati, erkin iqtisodiy, kichik sanoat va yoshlar sanoat zonalaridagi ishlar, mahalliy budjetning qo‘shimcha manbalari hisobidan amalga oshiriladigan tadbirlar hamda “Infratuzilma va ijtimoiy barqarorlik” jamg‘armasi mablag‘laridan foydalanish masalalari yuzasidan mas’ul rahbarlarning hisobotlari eshitildi.

Shuningdek, Kogon shahar hokimligida qonunchilik hujjatlari va topshiriqlar ijrosining holati to‘g‘risidagi axborot, Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiya tomonidan amalga oshirilgan ishlar to‘g‘risidagi hamda Korrupsiyaga qarshi kurashish va xavfsizlik masalalari bo‘yicha doimiy komissiya faoliyati yuzasidan axborotlar tinglandi.

Muhokamalar jarayonida deputatlar tomonidan qator amaliy takliflar ilgari surildi va keng muhokama qilindi.

Sessiya ijtimoiy tarmoqlar orqali, jumladan Telegram, Instagram, Facebook va YouTube platformalarida to‘g‘ridan-to‘g‘ri jonli efirda keng jamoatchilikka yoritib borildi.

Sessiyada kun tartibiga kiritilgan masalalar yuzasidan tegishli qarorlar qabul qilindi hamda mas’ullarga aniq vazifalar belgilab berildi.

Xalq deputatlari Kogon shahar Kengashining 29-sessiyasi hududni kompleks rivojlantirish, qonunchilik ijrosini ta’minlash va aholi farovonligini oshirishga qaratilgan muhim qarorlar bilan yakunlandi.

Telegram
Instagram
Facebook
Youtube
E-kengash