Xalq deputatlari Termiz shahar Kengashi raisi D.Normurodova, shahar Kengashi deputatlari B.Rahmatullayev, S.Xodjayev, I.Tangirov hamda kotibiyat bosh mutaxassisi R.Mamashukurov shahardagi “Manguzar” mahallasida bo‘lib, hududdagi ko‘p qavatli uylarning holati yuzasidan o‘rganish olib bordilar.

Nazorat tadbiri davomida ko‘p qavatli uylarning ichki yo‘laklari (pod’yezdlari), yerto‘lalari, atrof hududlarning sanitariya holati, obodonlashtirish ishlari hamda tashqi yoritish tizimining ahvoli atroflicha ko‘zdan kechirildi. Shuningdek, hudud obodligi, aholi uchun yaratilgan yashash sharoitlari va boshqaruv servis kompaniyalari tomonidan amalga oshirilayotgan ishlar tahlil qilindi.

O‘rganish yakunlari bo‘yicha ko‘p qavatli uy-joy fondini saqlash, hududlarda sanitariya va obodonlashtirish ishlarini yanada kuchaytirish, yoritish tizimlarini yaxshilash hamda aholi uchun munosib va xavfsiz yashash muhitini yaratish yuzasidan mas’ullarga tegishli tavsiyalar berildi.