Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat A.Kulbayev tumanning “Dumaloq” mahallasining Zukkolar ko‘chasida istiqomat qiluvchi aholining muammolarini “xonadonbay” asosda o‘rgandi.

🔻O‘rganish davomida xonadonlarda yashovchi fuqarolar bilan suhbatlar o‘tkazilib, ularning kundalik turmush sharoiti, kommunal xizmatlardan foydalanish holati hamda mavjud muammolari bilan yaqindan tanishildi.

🔻Jumladan, aholini elektr energiyasi bilan ta’minlash, tabiiy gaz yetkazib berish va ichimlik suvi ta’minoti bilan bog‘liq masalalar o‘rganildi. Muloqotlar davomida mazkur yo‘nalishlarda fuqarolar tomonidan jiddiy muammolar bildirilmagan.

🔻Shu bilan birga, ayrim fuqarolar tomonidan maishiy chiqindilarni o‘z vaqtida olib chiqib ketish xizmatida uzilishlar kuzatilayotgani yuzasidan murojaatlar bildirildi. Ushbu masala aholi yashash hududlarining sanitariya holatini saqlash, atrof-muhitni muhofaza qilish hamda fuqarolar uchun qulay va ozoda yashash sharoitlarini yaratish bo‘yicha muhim ahamiyatga ega ekanligi qayd etildi.

🔻Deputat tomonidan mazkur murojaatlarning mazmuni o‘rganilib, chiqindilarni olib chiqib ketish xizmatining barqaror ishlashi, belgilangan jadvalga rioya etilishi va fuqarolar murojaatlariga mas’ul tashkilotlar tomonidan o‘z vaqtida munosabat bildirilishi zarurligi ta’kidlanib, deputat so‘rovi yuborilishi belgilandi.