O‘zbekiston Respublikasi Prezidenti Shavkat Mirziyoyevning 2025-yil 8-oktabrdagi PQ–298-son Qarori hamda joriy yilning 14-oktabr kuni o‘tkazilgan videoselektor yig‘ilishida bergan topshiriqlari ijrosini ta’minlash maqsadida, joylarda keng ko‘lamli obodonlashtirish va ijtimoiy faollik ishlariga alohida e’tibor qaratilmoqda. Ushbu qaror mahalla tizimini yanada mustahkamlash, aholining hayot sifatini yaxshilash, mahallalarda tozalik, ozodalik va hamjihatlik muhitini yanada kuchaytirishga xizmat qilmoqda.

Mazkur topshiriqlar asosida “Mahalla yettiligi”ning 2025-yil oxirigacha hamda 2026-yilda amalga oshiriladigan dasturi ishlab chiqildi. Dasturda aholining farovonligini oshirish, infratuzilma va ijtimoiy sohalarni rivojlantirish, yoshlar bandligini ta’minlash, ekologik muhitni yaxshilash, mahalla hududlarini ko‘kalamzorlashtirish kabi qator vazifalar belgilab berilgan.

Bugun Payariq tumanidagi barcha mahallalarda “Mahalla yettiligi” vakillari tomonidan mazkur dastur yuzasidan aholiga murojaatlar yo‘llanmoqda. Murojaatlarda fuqarolardan o‘z mahallalarida amalga oshirilayotgan obodonlashtirish, tozalik va tartib-intizom ishlariga befarq bo‘lmaslik, jamoaviy tashabbuslarni qo‘llab-quvvatlash hamda o‘z hissasini qo‘shish so‘ralmoqda.

Shuningdek, nuroniylar, faxriylar, faollar, ko‘ngilli yoshlar hamda mahalla yettiligi a’zolari ishtirokida keng muhokamalar o‘tkazilib, tumanda jadal sur’atlar bilan olib borilayotgan islohotlarga fuqarolarning faol qo‘shilishi zarurligi alohida qayd etildi. Bu jarayonlarda mahalla raislari, xotin-qizlar faollari, profilaktika inspektorlari va yoshlar yetakchilari o‘zaro hamkorlikda ishlayapti.

Yurtimizda e’lon qilingan “Tozalik va ozodalik oyligi” doirasida olib borilayotgan obodonlashtirish, ko‘kalamzorlashtirish ishlari mahallamiz qiyofasini yanada chiroyli, yashil va fayzli etmoqda. Fuqarolar tomonidan daraxt va gul ko‘chatlari ekilmoqda, ariqlar tozalanmoqda, chiqindilar tashlab yuborilayotgan joylarda tartib o‘rnatilmoqda. Bu tashabbuslarning barchasi nafaqat tashqi muhitni, balki odamlar qalbini ham poklashga xizmat qilayapti.

Mahalla — bu xalqimizning yuragi, jamiyatimizning tayanchi. Obod, toza va tinch mahalla esa — baxtli hayot garovidir. Shu bois, har bir fuqaro o‘z hovlisi, ko‘chasi va mahallasi uchun mas’uliyatni chuqur his etib, bu ezgu tashabbuslarga o‘z hissasini qo‘shmog‘i lozim. Bu jarayonlarda hamjihatlik, o‘zaro hurmat va jipslik muhim o‘rin tutadi. Chunki birlashgan elni hech kim yenga olmaydi.

Mahallamizni obod qilish yo‘lida olib borilayotgan ishlar kelajak avlodlar uchun yaratilayotgan farovon muhitning poydevoridir. Bugun qilinayotgan har bir ezgu ish, ertangi tinch va baxtli hayotimiz garovidir.

Zero, mahallamiz obodligi — barchamizniki!

 Hurmat bilan,

Payariq tumani 18- O‘rta Saydov okrugi  deputati

L. Djamolova