Xalq deputatlari Marg‘ilon shahar Kengashi deputati X.Mashrabayeva tomonidan fuqarolar murojaati asosida “Toshkesar” MFY hududidagi mavjud muammo yuzasidan deputat so‘rovi yuborildi.

Murojaatda To‘ralar va Madali Hofiz ko‘chalari kesishmasida yo‘l qoplamasining cho‘kishi oqibatida oqava suv tarmog‘ida nosozlik yuzaga kelgani, buning natijasida 55 ta xonadonda antisanitariya holati vujudga kelib, aholi uchun noqulayliklar tug‘dirayotgani qayd etilgan.

Mazkur holatni bartaraf etish maqsadida Marg‘ilon shahar hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputat so‘rovi kiritildi.

Unda muammoni joyiga chiqib o‘rganish, oqava suv tarmog‘idagi nosozliklarni bartaraf etish, yo‘lning cho‘kkan qismini ta’mirlash hamda murojaatning uzoq vaqt davomida ijrosiz qolish sabablari yuzasidan asoslantirilgan tushuntirish taqdim etish so‘ralgan.