BUDJET MABLAG‘LARIDAN SAMARALI FOYDALANISH — DEPUTATLIK NAZORATIDA

Xalq deputatlari Termiz tuman Kengashi raisi S.Nazarov  hamda deputatlar Sh.Norsayev, K.Abdullayeva tuman Moliya bo‘limida bo‘lib, hududning moliyaviy holati, mahalliy budjet mablag‘larining shakllantirilishi va ulardan samarali foydalanish masalalarini o‘rgandilar.

O‘rganish davomida tuman budjetining daromad va xarajatlar qismi, ijtimoiy sohani moliyalashtirish, hududlarda amalga oshirilayotgan ishlarni moliyaviy ta’minlash hamda deputatlar tomonidan ilgari surilayotgan taklif va tashabbuslarni qo‘llab-quvvatlash masalalariga alohida e’tibor qaratildi.

Shuningdek, budjet mablag‘laridan maqsadli, oqilona va samarali foydalanish, aholining ijtimoiy muammolarini hal etishga yo‘naltirilayotgan mablag‘larning natijadorligini oshirish yuzasidan mas’ullarga tegishli taklif va tavsiyalar bildirildi.

Kengash raisi va deputatlar tomonidan moliyaviy masalalar ustidan deputatlik nazoratini kuchaytirish, budjet mablag‘larining har bir so‘mi xalq manfaatlariga xizmat qilishini ta’minlash muhim vazifa ekani ta’kidlandi.

Mazkur o‘rganishlar kelgusida tuman budjetini shakllantirish va mablag‘larni hududlarning eng dolzarb muammolarini hal etishga yo‘naltirishda muhim ahamiyat kasb etadi.