Hududlarda aholi muammolarini hal etishda mahalliy Kengash deputatlari hamda “mahalla yettiligi” o‘rtasidagi hamkorlik tobora kuchayib bormoqda.

O‘zbekiston Respublikasi Oliy Majlisi Senati Kengashining 2025-yil 14-yanvardagi KQ-35-V-son qarori hamda Xalq deputatlari Ishtixon tumani Kengashining 2025-yil 28-fevraldagi VII-6-60-7-95-K/25-sonli qaroriga muvofiq, tumandagi barcha mahallalarga deputatlar biriktirilib, ularning “mahalla yettiligi” bilan ishlash tizimi yo‘lga qo‘yildi.

Mazkur tizim asosida deputatlar mahallalarda fuqarolar bilan muntazam uchrashib, muammolarni joyida o‘rganmoqda, “mahalla yettiligi” bilan birgalikda ularni hal etish bo‘yicha amaliy choralar ko‘rmoqda.

📌 2025-yil davomida:

— 85 ta fuqarolar qabuli o‘tkazildi;

— 242 nafar fuqarolarning murojaatlari ko‘rib chiqildi;

— 250 ga yaqin muammolar aniqlanib, ularni hal etish bo‘yicha aniq chora-tadbirlar belgilandi.

📌 2026-yilning 1-choragida:

— deputatlar va “mahalla yettiligi” hamkorligida 17 ta fuqarolar qabuli tashkil etildi;

— 115 nafar fuqarolarning murojaatlari o‘rganildi;

— 100 ga yaqin muammolar aniqlanib, shundan 72 tasi yuzasidan ularni bartaraf etish bo‘yicha amaliy ishlar boshlab yuborildi.

Shuningdek, mahallalardagi eng dolzarb 25 ta masala deputatlar tomonidan joyiga chiqib o‘rganilib, 2026-yil 30-mart kuni Xalq deputatlari Ishtixon tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasida muhokama qilindi hamda navbatdagi sessiya kun tartibiga kiritildi.

Bugun deputatlar va “mahalla yettiligi”ning birgalikdagi ishlari natijasida mahallalarda mavjud muammolar o‘z vaqtida aniqlanib, ularni bartaraf etish bo‘yicha aniq va manzilli choralar ko‘rilmoqda. Bu esa fuqarolarning davlat organlariga bo‘lgan ishonchini mustahkamlash, hududlarni rivojlantirish va aholi farovonligini oshirishga xizmat qilmoqda.