Saylovchilar bilan doimiy va samimiy muloqotda bo‘lish, ularning dardu tashvishlarini eshitish hamda mahalla darajasidagi muammolarga adolatli va tezkor yechim topish — deputatlik faoliyatining bosh mezonidir.
Xalq deputatlari Termiz shahar Kengashining 19-“Ma’rifat” saylov okrugi deputati A.Mustafakulov hamda Kengash kotibiyati bosh mutaxassisi R.Mamashukurovlar “Ma’rifat” mahallasida bo‘lib, saylovchilar bilan navbatdagi ochiq muloqot va uchrashuvni o‘tkazdilar.
Mazkur nazorat-tahlil va muloqot tadbiri Oliy Majlis Senati tomonidan mahalliy Kengash deputatlari faoliyati uchun belgilangan “Mahalliy Kengash deputati faoliyatining eng muhim 24 ta yo‘nalishi” mezonlari doirasida tashkil etildi.
Ochiq va jonli tarzda kechgan uchrashuv davomida fuqarolar tomonidan turli ijtimoiy-hayotiy masalalar, xususan, hudud infratuzilmasini yaxshilash, kommunal ta’minot, ko‘chalarni obodonlashtirish hamda aholini ijtimoiy qo‘llab-quvvatlash bilan bog‘liq muammolar, amaliy taklif va murojaatlar o‘rtaga tashlandi.
Saylovchilar tomonidan bildirilgan har bir murojaat va konstruktiv taklif e’tibordan chetda qolmaydi:
1. Barcha murakkab va yechimini kutayotgan masalalar deputat A.Mustafakulovning shaxsiy murojaat daftariga batafsil qayd etildi;
2. Murojaatlarning amaliy yechimini ta’minlash maqsadida tegishli shahar mutasaddi tashkilot va idoralariga rasmiy deputatlik so‘rovlari yuborilishi hamda ularning ijrosi qat’iy nazoratga olinishi belgilab olindi.