🇺🇿 Xalq deputatlari Uchtepa tumani Kengashning “9-Jurjoniy” okrugi deputati, Kengash raisi Ismanov Ja’far Xodjimuratovich tomonidan Mahalliy Kengash deputati faoliyatining eng muhim 24 ta yo‘nalishidan biri — “Mahallalarda aholi va bolalar uchun sport inshootlari, umumta’lim maktablari, kollej va akademik litseylarning sport zallari hamda ulardagi sport anjomlari mavjudligi, ularning jihozlanish holati” yuzasidan o‘rganish ishlari olib borildi.

📇 O‘rganish jarayonida Uchtepa tumanidagi 2-son sport maktabi faoliyati ko‘zdan kechirildi. Sport maktabida 1 ta sport zali va 1 ta suzish havzasi faoliyat yuritib, muassasa 240 nafar o‘quvchiga mo‘ljallangan.

🔼 Muassasada jami 60 nafar xodim faoliyat olib borayotgan bo‘lib, ulardan 35 nafari trenerlardir. Sport maktabida olimpiya, milliy va paralimpiya sport turlari bo‘yicha 20 ta yo‘nalishda mashg‘ulotlar tashkil etilgan. Jumladan, badiiy gimnastika, badminton, voleybol, dzyudo, suzish, futbol, yengil atletika, karate, qo‘l jangi hamda belbog‘li kurash sport turlari bo‘yicha yoshlar muntazam shug‘ullanmoqda.

🥇 2025-yil davomida sportchilar tomonidan jami 151 ta medal qo‘lga kiritilgan bo‘lib, shundan 38 tasi oltin, 47 tasi kumush va 66 tasi bronza medallaridir. Shuningdek, jahon va Osiyo chempionatlarida 31 ta, O‘zbekiston chempionati va kuboklarida esa 120 ta medal qo‘lga kiritilgan.

🗣 O‘rganish davomida Kengash raisi tomonidan sport inventarlari holati, ulardan foydalanish darajasi hamda sport binolaridan samarali foydalanish holati ham atroflicha ko‘rib chiqildi. Muassasada yoshlarning sport bilan muntazam shug‘ullanishi uchun yaratilgan sharoitlar alohida e’tirof etildi.