“Deputat va yoshlar” uchrashuvi yoshlar uchun motivatsion muloqot maydoniga aylandi

 🇺🇿 O‘zbekiston Respublikasi Prezidenti tomonidan joriy yilning 24-fevral kuni Ko‘ksaroy qarorgohida o‘tkazilgan “Yoshlarning tashabbuslarini qo‘llab-quvvatlash bo‘yicha qo‘shimcha imkoniyatlar”ga bag‘ishlangan ochiq muloqotda belgilab berilgan vazifalar ijrosini ta’minlash maqsadida Uchtepa tumanida navbatdagi uchrashuv tashkil etildi.

 🗣 Xalq deputatlari Uchtepa tumani Kengashi deputatlari Bobur Xalmatov hamda Saodat Malikova ishtirokida “Yoshlar kuni” doirasida “Deputat va yoshlar” mavzusida uchrashuv tumandagi 203-umumta'lim maktabida o‘tkazildi.

 📇 Mazkur uchrashuvdan ko‘zlangan asosiy maqsad yoshlarning fikr va tashabbuslarini qo‘llab-quvvatlash, ularning jamiyatdagi faolligini oshirish hamda kelajak oldidagi maqsadlarini yanada mustahkamlashdan iborat bo‘ldi.

 💬 Tadbir davomida 11-sinf o‘quvchilari — S.G‘aybullayev, A.Adhamjonov hamda A.Abdug‘aniyev kabi faol yoshlar o‘zlarining yutuqlari, tashabbuslari va kelajak rejalari bilan o‘rtoqlashdilar. Yoshlarning bilim olishga bo‘lgan intilishi, yangi g‘oya va takliflari yig‘ilganlarda katta taassurot qoldirdi.

 🧠 Shuningdek, deputatlar ham o‘z hayotiy tajribalaridan kelib chiqib, yoshlarga muvaffaqiyatga erishish yo‘lida doimiy izlanish, bilim olish va o‘z ustida ishlash muhim ekanligini ta’kidladilar. Ular bugungi yoshlar mamlakat kelajagi, Yangi O‘zbekiston taraqqiyotining eng katta tayanchi ekanini alohida qayd etdilar.

 ↗️ Uchrashuv samimiy va ochiq muloqot ruhida o‘tib, yoshlar o‘zlarini qiziqtirgan savollarga javob oldilar. Tadbir yoshlarni yangi marralar sari ruhlantirish, ularning tashabbuslarini qo‘llab-quvvatlash va kelajakka bo‘lgan ishonchini mustahkamlashda muhim ahamiyat kasb etdi.