Давлатимиз раҳбари Шавкат Мирзиёевнинг Венгрияга қилган расмий ташрифи, хусусан Венгрия Бош вазири Виктор Орбан билан ўтказилган музокаралар мамлакатимизнинг ташқи сиёсатдаги янада фаол ва манфаатли йўналишларини мустаҳкамлаб бормоқда. "Кармелита" саройида бўлиб ўтган тор доирадаги ва расмий делегациялар иштирокидаги учрашувлар, энг аввало, Ўзбекистоннинг Европа Иттифоқи билан муносабатларида Венгриянинг муҳим шерик сифатидаги ўрнини янада мустаҳкамлади.

Энг муҳим натижалардан бири сифатида Ўзбекистон ва Венгрия ўртасида кенгайтирилган стратегик шериклик муносабатларини ўрнатиш тўғрисидаги қўшма декларациянинг имзоланганини алоҳида қайд этиш лозим. Бу ҳужжат икки томонлама муносабатларни нафақат сиёсий, балки иқтисодий, маданий, илмий ва таълим соҳаларида ҳам янги босқичга кўтаради.

Музокаралар якунида қабул қилинган ҳукуматлараро ва идоралараро ҳужжатлар, уларнинг ҳаётга татбиқ этилиши орқали, халқларимиз манфаатларига хизмат қилувчи лойиҳалар амалга оширилишига замин яратади. Жумладан, инвестициялар, савдо, қишлоқ хўжалиги, таълим ва соғлиқни сақлаш соҳаларидаги ҳамкорликлар алоҳида аҳамиятга эга бўлади.

Президентимиз иштирок этган Туркий давлатлар ташкилотининг норасмий саммити, бугунги кунда туркий дунёдаги ҳамжиҳатлик, яқин қўшничилик ва тарихий илдизларга асосланган стратегик ҳамкорликни янада мустаҳкамлашга хизмат қилди. Ушбу саммит доирасида таъсис этилган Алишер Навоий номидаги халқаро мукофотнинг тақдим этилиши – буюк бобокалонимиз меросини бутун туркий оламда янада кенг тарғиб этишда муҳим қадам бўлди.

Хулоса сифатида, бу ташриф ва ундаги ташаббуслар – Ўзбекистоннинг очиқ, амалий ва мувозанатли ташқи сиёсати самараси эканини яна бир бор намоён этди. Бундай учрашув ва ҳамкорликлар маҳаллий даражада, жумладан, Навоий вилояти ва Кармана туманидаги иқтисодий ислоҳотлар, хорижий инвестициялар жалб этиш, ёшларни таълим ва илм-фанга жалб қилиш бўйича янги имкониятлар эшигини очади.

Фахр ва дастуриламал сифатида қабул қиламиз.

Ҳар томонлама ривожланган Ўзбекистон сари бошланган бу зафарли йўлда барчамиз ҳамжиҳат ва масъулиятли бўлишимиз шарт!

Алижон Жўраев,

Халқ депутатлари Кармана туман Кенгаши депутати