Infratuzilma va ijtimoiy barqarorlik” jamg‘armasi mablag‘larini yo‘naltirish masalasi doimiy komissiyada muhokama qilindi

Hisobotda ta’kidlanganidek, O‘zbekiston Respublikasi Prezidentining 2025-yil 31-yanvardagi PF–17-son Farmoni asosida hududlarda infratuzilma va ijtimoiy sohadagi dolzarb muammolarni bartaraf etishga qaratilgan loyihalarni moliyalashtirish belgilangan.

Mazkur Farmon ijrosini ta’minlash maqsadida Termiz tumani bo‘yicha 2026-yilda amalga oshiriladigan tadbirlar rejasi ishlab chiqilgan bo‘lib, jami 973 million 600 ming so‘m mablag‘ yo‘naltirilishi rejalashtirilgan.

Rejaga muvofiq:

123,6 million so‘m evaziga ijtimoiy reyestrda ro‘yxatda turgan, I-guruh nogironligi bo‘lgan hamda mehnatga layoqatli a’zosi mavjud bo‘lmagan 2 ta oilaning xonadoniga quyosh panellari o‘rnatiladi;
500 million so‘m hisobidan Guliston MFY hududidagi avtomobil va temir yo‘l yoqalarida obodonlashtirish ishlari amalga oshiriladi;
100 million so‘m mablag‘ evaziga Qoraxon mahallasi hududidan o‘tuvchi M41 “Bishkek – Dushanbe – Termiz” xalqaro avtomobil yo‘li bo‘yida zamonaviy hojatxona va dam olish maskani barpo etiladi;
250 million so‘m hisobidan Soliobod MFY hududidagi xizmat uylariga olib boruvchi yo‘l atrofidagi devorlarni ta’mirlash va zamonaviy qiyofaga keltirish ishlari bajariladi.
Qayd etilganidek, mazkur loyihalar aholini ijtimoiy qo‘llab-quvvatlash, energiya tejamkor texnologiyalarni joriy etish, hududlarni obodonlashtirish, turizm infratuzilmasini rivojlantirish hamda mahallalarning estetik qiyofasini yanada yaxshilashga xizmat qiladi.

Tadbirlarning buyurtmachisi va ijrosini muvofiqlashtiruvchi tashkilotlar etib Termiz tumani hokimligi, Termiz tumani Iqtisodiyot va moliya bo‘limi hamda Termiz tumani “Inson” ijtimoiy xizmatlar markazi belgilangan. Moliyalashtirish “Infratuzilma va ijtimoiy barqarorlik” jamg‘armasi mablag‘lari hisobidan amalga oshiriladi.