Deputat mekteptegi oqıwshı qızlar menen sáwbetlesti

Deputat G.Bayjanova tárepinen mektepte bilim alıp atırǵan oqıwshı qızlar menen qızǵın sáwbet ótkerildi. Sáwbetlesiw dawamında qızlardıń tálim-tárbiya procesi, bos waqıtların mazmunlı shólkemlestiriw, pánlerdi puqta ózlestiriwi hám keleshektegi maqset hám arzıwları menen qızıqsındı.

Sáwbetlesiw dawamında erjetpegen qızlar arasında erte turmısqa shıǵıwdıń aldın alıw, olardıń bilim alıwın dawam ettiriwi hám keleshektegi turmıslıq maqsetlerin anıq belgilep alıwına ayrıqsha itibar qaratıldı.

Deputat tárepinen tómendegi usınıslar bildirildi:

- oqıwshı qızlar hám olardıń ata-analarınıń qatnasıwında erte turmıstıń bilimlendiriw hám keleshektegi imkaniyatlarǵa tásiri boyınsha turaqlı profilaktikalıq sáwbetler ótkeriw;
- klass basshıları, mektep psixologi hám máhálle belsendileri menen birgelikte erte turmıs qurıw qáwpi bar shańaraqlardı individual úyreniw;
- qızlardıń bilim alıwdı dawam ettiriwi, kásip-óner hám zamanagóy bilimlerdi ielewi ushın zárúr sharayatlardı jaqsılaw;
- oqıwshı qızlardıń mashqalaların turaqlı tıńlaw hám múrájatların óz waqtında úyreniw;
- ata-analar menen perzent tárbiyası, qızlardıń huqıqları menen máplerin qorǵaw jáne olardıń keleshegin támiyinlew máselelerinde túsindiriw jumısların kúsheytiw.

Sonday-aq, qızlarǵa bilim alıwdı dawam ettiriw, kásip iyelew hám erkin turmısqa puqta tayarlıq kóriw áhmiyetli ekenligi túsindirildi. Bildirilgen usınıslar tiykarında mektep hám máhálle birge islesiwinde ámeliy jumıslardı dawam ettiriw belgilendi.