Мақола Қорақалпоғистондаги ислоҳотларнинг асосий мақсади — инсон ҳамоҳанглиги ва фаровонлигини таъминлашда маҳалланинг марказий ўринга эга эканлигини таърифлашда. "Маҳаллабай" ва "хонадонбай" тамойиллари асосида аҳолининг ижтимоий, иш ва яшаш муаммоларини жойида ҳал қилиш, шунингдек, ҳудудларни ободонлаштиришга алоҳида эътибор қаратилмоқда.

Хўжайли туманида депутатлар ташаббусида аҳоли билан очиқ мулоқот ўрнатилган бўлиб, бу тизим давлат ва жамият ўртасидаги ҳамкорликни мустаҳкамлайди. Мақола муаллифи А. Таджимуратовнинг фикрича, маҳаллаларнинг обод бўлиши оила ва жамият фаровонлигининг асосини ташкил этади.

Cocoon AI Summary

Бугун мамлакатимизда амалга оширилаётган кенг кўламли ислоҳотларнинг асосий мақсади — инсон қадрини улуғлаш, аҳоли учун муносиб турмуш шароитини яратиш ва халқ фаровонлигини таъминлашдан иборат. Бу эзгу мақсадлар, энг аввало, инсоннинг кундалик ҳаётида, унинг оиласи ва маҳалласида намоён бўлмоқда.

Маҳалла азалдан халқимизнинг ўзига хос бошқарув ва ҳамжиҳатлик маскани бўлиб келган. Унда одамларнинг қувончи ҳам, ташвиши ҳам, орзу-мақсадлари ҳам мужассам. Шу боис бугун маҳалланинг жамият ҳаётидаги ўрни янада юксалиб, у давлат билан халқ ўртасидаги энг яқин ва муҳим бўғинга айланмоқда.

Сўнгги йилларда маҳалла тизимини такомиллаштириш, унинг имкониятларини кенгайтириш, аҳоли муаммоларини жойида ўрганиш ва ҳал этишга қаратилган янги ёндашувлар жорий этилди. “Маҳаллабай”, “хонадонбай” ва “фуқаробай” ишлаш тамойиллари асосида ҳар бир оиланинг ҳолати, эҳтиёжи ва имконияти ўрганилиб, манзилли ёрдам кўрсатишга эътибор кучайтирилди.

Бу жараёнда асосий эътибор муаммони шунчаки аниқлаш эмас, балки унинг амалий ечимини топишга қаратилмоқда. Ишсиз фуқарони ишга жойлаштириш, тадбиркорлик истагидаги инсонга кўмак бериш, эҳтиёжманд оилани ижтимоий қўллаб-қувватлаш, ёшларни касб-ҳунарга йўналтириш каби вазифалар маҳалланинг кундалик фаолиятининг муҳим қисмига айланмоқда.

Айниқса, аҳоли билан очиқ мулоқот қилиш, уларнинг мурожаатларини эшитиш ва муаммоларини жойида ҳал этиш давлат бошқарувидаги муҳим тамойиллардан бири сифатида шаклланмоқда. Чунки одамлар ўз муаммосига ечимни, аввало, яқин ҳудудида — маҳаллада кўришни истайди.

Маҳалладаги ҳар бир ўзгариш инсон ҳаёти билан чамбарчас боғлиқ. Йўлларнинг таъмирланиши, кўчаларнинг ёритилиши, ичимлик суви таъминотининг яхшиланиши, ободонлаштириш ва кўкаламзорлаштириш ишлари аҳолининг кундалик турмушига бевосита таъсир қилади.

Шу маънода маҳалла бугун оддий ҳудуд эмас, балки ислоҳотларнинг амалий натижаси кўринадиган асосий масканга айланмоқда. Юртимиздаги ҳар бир янгиланишнинг самараси одамларнинг ҳаётида, хонадонларида ва маҳаллаларида акс этсагина, унинг ҳақиқий натижаси ҳақида сўз юритиш мумкин.

Хўжайли туманида ҳам маҳаллалар билан ишлаш, аҳоли мурожаатларини ўрганиш ва уларнинг муаммоларини ҳал этишга алоҳида эътибор қаратилмоқда. Депутатларнинг сайловчилар билан учрашувлари, сайёр қабуллар, депутатлик сўровлари ва жамоатчилик назорати тадбирлари орқали ҳудудлардаги долзарб масалалар аниқланиб, уларнинг ечими бўйича тегишли чоралар кўрилмоқда.

Бундай ишлар маҳалла ва давлат идоралари ўртасидаги ҳамкорликни янада мустаҳкамлайди. Энг муҳими, фуқаронинг мурожаати эътиборсиз қолмаслиги, ҳар бир масала юзасидан амалий натижа бўлишига хизмат қилади.

Зеро, маҳалла — халқнинг дарди ва орзуси билан юзма-юз келинадиган, ислоҳотлар натижаси бевосита инсон ҳаётида намоён бўладиган маскандир. Маҳалла обод бўлса, хонадон обод, хонадон обод бўлса, жамият фаровон бўлади.

А.Таджимуратов
Халқ депутатлари Хўжайли туман Кенгаши депутати