ЯШИЛЛИККА БУРКАНАЁТГАН ОБОД ЮРТИМИЗ
Бугунги кунда юртимизда атроф-муҳитни муҳофаза қилиш, экологик барқарорликни таъминлаш, шаҳар ва қишлоқларимизни янада обод ҳамда кўркам масканларга айлантиришга устувор аҳамият қаратилмоқда. Бу борада амалга оширилаётган эзгу ташаббуслар аҳолининг муносиб ва соғлом муҳитда яшаши учун қулай шароитлар яратишга хизмат қилмоқда.
«Яшил макон» умуммиллий лойиҳаси ушбу йўналишдаги ишларни янги босқичга олиб чиқди. Лойиҳанинг асосий мақсади шунчаки кўчат экиш эмас, балки яшил ҳудудларни изчил кўпайтириш, мавжуд дарахтзорларни муҳофаза қилиш, уларни тўғри парваришлаш ва келажак авлод учун мусаффо табиий муҳит яратишдан иборат.
Янгиқўрғон туманида ҳам мазкур умуммиллий лойиҳа доирасида кенг кўламли кўкаламзорлаштириш ва ободонлаштириш ишлари олиб борилмоқда.
Туманнинг маҳалла ва қишлоқларида, ички ҳамда марказий йўллар бўйларида, ижтимоий соҳа объектлари, корхона ва ташкилотлар ҳудудларида янги дарахтзорлар барпо этилмоқда. Бўш турган ер майдонларидан самарали фойдаланилиб, улар обод ва яшил масканларга айлантириляпти.
Кўчат экиш ишларида Янгиқўрғоннинг табиий иқлим шароити, тупроқ таркиби ва сув таъминоти ҳисобга олиниб, ҳудудга мос манзарали ҳамда мевали дарахт турларини танлашга алоҳида эътибор қаратилмоқда. Экилган ниҳолларнинг тўлиқ униб-ўсишини таъминлаш мақсадида уларни ўз вақтида суғориш, озиқлантириш, шакл бериш, атрофини юмшатиш ва турли зараркунандалардан ҳимоя қилиш ишлари йўлга қўйилмоқда.
Дарахт экиш билан бир қаторда, уни асраб-авайлаш ва вояга етказиш ҳам муҳим вазифадир. Шу боис ҳар бир яшил ҳудуд ҳамда кўчат учун масъуллар бириктирилиб, уларнинг ҳолатини мунтазам назорат қилишга эътибор кучайтирилмоқда. Мавжуд дарахтларни ноқонуний кесилишдан муҳофаза қилиш, қуриб қолган кўчатлар ўрнига янгиларини экиш ва суғориш тизимларини яхшилаш бўйича тегишли чоралар кўрилмоқда.Бу хайрли ишларга корхона ва ташкилотлар ходимлари, таълим ва тиббиёт муассасалари жамоалари, маҳалла фаоллари, ёшлар ҳамда кенг жамоатчилик муносиб ҳисса қўшмоқда. Умумхалқ ҳашарлари ва кўчат экиш акциялари аҳоли ўртасида табиатга меҳр, она заминга дахлдорлик ҳамда экологик маданиятни янада мустаҳкамламоқда.
Барпо этилаётган яшил майдонлар туманнинг экологик муҳитини яхшилашда муҳим аҳамият касб этади. Дарахтлар ҳавони тозалайди, кислород миқдорини оширади, чанг ва шовқинни камайтиради, ёзнинг иссиқ кунларида салқинлик яратади. Шу билан бирга, янги дарахтзорлар маҳалла ва кўчалар кўркига кўрк қўшиб, аҳолининг дам олиши учун қулай ва файзли масканларни вужудга келтиради.«Яшил макон» лойиҳаси доирасида амалга оширилаётган ишлар обод юртимизни янада яшнатиш, табиий бойликларимизни асраб-авайлаш ва аҳоли саломатлигини муҳофаза қилишга қаратилган эзгу ҳаракатдир. Унинг муваффақияти эса ҳар биримизнинг экилган ниҳолларга бўлган эътиборимиз, масъулиятимиз ва табиатга муносабатимизга боғлиқ.
Бугун Янгиқўрғонда қадалаётган ҳар бир кўчат — эртанги куннинг мусаффо ҳавоси, файзли маҳаллалар ва яшил келажак пойдеворидир. Табиатга меҳр билан экилган ниҳоллар йиллар ўтиб улкан дарахтларга айланиб, обод юртимизнинг кўрки ва келажак авлод учун бебаҳо яшил мерос бўлиб қолади.